Almaty men Shymkent modýldik aýrýhanalaryna jumsalǵan qarjy tekserilip jatyr. Bul týraly QR Sybaılas jemqorlyqqa qarsy is-qımyl agenttigi jemqorlyqqa qarsy is-qımyl 1-departamentiniń basshysy Murat Ahmetov aıtty, dep habarlaıdy Egemen.kz
«Modýldik aýrýhanalar boıynsha agenttikte 2 is bar. Tek Almaty emes, Shymkent qalasynda da tergeý júrip jatyr. Júrgizilgen memlekettik aýdıt aktileriniń nátıjesinde belgili bir soma anyqtalyp, oǵan saraptama taǵaıyndaldy. Olar aıaqtalǵannan keıin sońǵy prosessýaldyq sheshim qabyldanady. Bul soma bastapqy, tek anyqtalǵany ǵana jáne sarapshylardyń qaraýynda. Memlekettik saraptama jobalyq-smetalyq qujattama boıynsha júrgizilip jatyr. Sondyqtan tergeý nátıjesi boıynsha naqty somany sizderge jetkizetin bolamyz. Ár aýrýhananyń quny - 5,5 mlrd teńgeden», dedi ol agenttiktiń alqa otyrysy aıasynda BAQ ókilderine bergen suhbatynda.
Onyń atap ótýinshe, kináliler tergeý barysynda anyqtalady. Al kúdiktiler alynǵan dálelder negizinde belgili bolady. Aýrýhana qurylysynyń qunyn negizsiz kóterýge qatysty da saraptama júrgizilip jatyr. Saraptamalar 1-2 aıǵa sozylady.
«Shynaıylyq úshin tergelip jatqan is aıasynda atalǵan faktige qatysýshylardyń barlyǵy tekseriledi», dedi Murat Ahmetov.