Qańtardyń orta sheninde qar qalyń tústi. Oblys ortalyǵynan úsh myń tekshe metrden astam qar shyǵaryldy. Qatal synshy – qys kommýnaldyq qyzmettiń olqylyǵyn, tosyn oqıǵaǵa tolyq daıyn emestigin áshkerelep berdi. Kommýnaldyq mekemeler kóbik qardy tazalaýǵa úlgere almaı jatyr.
Kókshetaý qalasyndaǵy qardy tazalaý mindeti «Kókshe tazalyq» pen «Zeren-2006» kommýnaldyq mekemelerine júktelgen. Alaıda, qos mekeme bar kúsh-múmkindikterin jumyldyrǵanymen, mol jaýǵan qarǵa shamalary keler emes. Burnaǵy jyldary nebir qarly boranda úsh-tórt kúnniń ishinde oblys ortalyǵyn tazalap úlgeretin. Bıylǵy berekesizdiktiń jolyn kesý úshin oblys ákimi Ermek Marjyqpaev qar tazalaý jumysyn úsh aýysymmen uıymdastyrýdy talap etip otyr. Qalalyq turǵyn úı-kommýnaldyq sharýashylyq bóliminiń basshysy Iýrıı Shıdlovskııge merdigerlerdiń óz mindetterin tap-tuınaqtaı etip atqarmaǵany úshin eskertý jasaldy. Qala irgesindegi «Qulager» shaǵyn aýdanyndaǵy qasat qar taý-teńiz. Qar qursaýynda qalǵan shaǵyn aýdannyń turǵyndary úshin qarǵa adym jer muń bolyp, úılerinen shyǵa almaı qaldy dese de bolady.
– Tirshilik bolǵan soń qamalyp úıde otyra almaısyń ǵoı. Bireý – jumysqa, bireý aýrýhanaǵa barǵysy keledi. Meniń de jubaıym syrqattanyp jatyr, biraq, bizdiń shaǵyn aýdanǵa jedel járdem kólikteri jete almaı, jigerimizdi qum qylyp otyr, deıdi shaǵyn aýdan turǵyny Jeńis Naýryzov, – Byltyr tazalap turatyn, bıyldyqqa qar tazalaıtyn tehnıkanyń qarasyn kóre almaı otyrmyz.
О́ńirdegi kúre joldardyń da jaǵdaıy ońyp turǵan joq. Máselen, Kókshetaý-Shýchınsk baǵytyndaǵy respýblıkalyq mańyzǵa ıe joldyń jaı-kúıine «Kazaqavtojol» kompanııasynyń №6 ýchaskesi jaýapty. Kólik aǵyny men joldyń mańyzyna oraı bes deńgeıge bólingen. Tıisinshe, tas jol eki saǵat ishinde tazartylýǵa tıisti. Áıtse de, bul tusta da jolaýshylardyń ókpesin qara qazandaı etetin jaı bar. Qapyda qalǵan júrgizýshi qanshama.
– Jedel áreket etý maqsatynda departamenttiń jeke quramy tolyq kúsheıtilgen jumys yrǵaǵyna kóshti, deıdi oblystyq tótenshe jaǵdaılar jónindegi departamenttiń bastyǵy Nurlan Atyǵaev, – Jol talǵamaıtyn 96 kólik daıyn tur. Qar qursaýynda qalýy múmkin, jalpy kólemi myń shaqyrymdy quraıtyn 390 ýchaske anyqtalyp, jylytý beketteri ornatyldy. Qazir oblystyq jáne respýblıkalyq mańyzdaǵy joldarda 890 tehnıka saqadaı saı.
Qys túskennen beri qutqarýshylar jolda qalǵan 48 jolaýshyǵa qol ushyn bergen. Negizinen, oblysta qardyń qasiretin tartyp otyrǵandar – Ereımentaý jáne Selınograd aýdandary.
Oblys ortalyǵynyń ózi omby qarǵa ońbaı batyp jatqanda, shalǵaıdaǵy shaǵyn aýyldardyń sharýasy shatqaıaqtaǵan-aq shyǵar.
Aqmola oblysy