«Áskerı qyzmet jáne áskerı qyzmetshilerdiń mártebesi týraly» Qazaqstan Respýblıkasynyń Zańyna sáıkes bıyl on jeti jasqa tolatyn jasóspirimder tirkelýge jatady. Aldyn ala esepteýler boıynsha Qazaqstanda bıyl júz myńnan astam jasóspirim áskerı esepke alynady, dep habarlaıdy Egemen.kz
Qazirgi ýaqytta jergilikti áskerı basqarý organdary azamattardy áskerge shaqyrý ýchaskelerine tirkeýdi júrgizedi, olardyń sanyn, áskerı qyzmetke jaramdylyǵyn anyqtaıdy, bilim deńgeıin, dene daıarlyǵyn belgileıdi.
- Jergilikti atqarýshy organdardyń sheshimimen medısınalyq komıssııalar quryldy. Jastarman laýazymdy tulǵalar áńgime júrgizip, tıisti qujattardyń bar-joǵyn tekseredi, sodan keıin medısınalyq kýálandyrýdan ótedi, dedi QR QK Bas shtaby Uıymdastyrý-jumyldyrý jumystary departamentiniń ókili podpolkovnık Azamat Dosymov.
Barlyq tekserýlerden keıin jasóspirimderge shaqyrý ýchaskesine tirkeý týraly kýálik jazylyp, qolyna birinshi áskerı qujat beriledi.
Tirkeý naýqany barysynda jasóspirimderge áskerı qyzmettiń artyqshylyqtary men keleshegin, sondaı-aq QR Qorǵanys mınıstrliginiń oqý oryndaryna túsý erejeleri jóninde de aıtylady.
Esterińizge sala keteıik, azamattardy shaqyrý ýchaskelerine tirkeý Qazaqstanda jyl saıyn, qańtardan bastap naýryzǵa deıin úsh aı boıy júrgiziledi.
Osyǵan baılanysty Qorǵanys mınıstrligi áskerge shaqyrý jasyna deıingi azamattardyń ata-analaryn tirkeý naýqanyna túsinistikpen qaraýdy suraıdy, dep podpolkovnık A. Dosymov atap ótti.
Tirkeý naýqany sanıtarlyq-epıdemıologııalyq talaptardy saqtaýmen ótkiziledi.