Shymkent qalasynyń ákimi Murat Áıtenov Densaýlyq saqtaý basqarmasynyń «Qalalyq onkologııalyq ortalyq» MKK-niń qazirgi jaǵdaıymen tanysty, dep habarlaıdy Egemen.kz
Qalada onkologııalyq qyzmetti jaqsarta otyryp, onkologııalyq aýrýlardy erte kezeńde anyqtaý, naýqastardyń 5 jyl jáne odan artyq ómir súrýin arttyrý baǵytynda keshendi jumystar atqarylýda. Skrınıngtik jáne jalpy profılaktıkalyq tekserýler óz jemisin berýde. Shymkent qalasynda 2018-2022 jyldarǵa arnalǵan keshendi jospardyń Jol kartasy sheńberinde is-sharalar júzege asyrylýda. 2020 jyly negizgi 11 ındıkator belgilengen.
Mekeme basshysy Jaqsylyq Máýlenovtiń aıtýynsha, birinshi ındıkator – onkologııalyq aýrýlardy erte kezeńde I catysynda anyqtaý kórsetkishi 16,8 paıyzǵa jetti. Jospardan 0,8 paıyzǵa artqan. Ekinshi ındıkator – naýqastardyń 5 jyl jáne odan artyq ómir súrýi jospar boıynsha 47 paıyz bolǵan. 2020 jyldyń qorytyndysy boıynsha 48,3 paıyzǵa joǵarylady. Sondaı-aq, jańadan tabylǵan onkologııalyq aýrýlardy dıagnostıkalyq tekserý úshin KT jáne MRT zertteýi boıynsha «ÁMSQ» KE AQ-men kelisimshart jasalyndy. О́tken jylǵy berilgen 11 onkologııalyq ındıkatordyń 7-i oryndaldy.
Jalpy ortalyq yńǵaılastyrylǵan ǵımaratta ornalastyrylǵan. 210 tósek orynǵa arnalǵan. Onyń ishinde 160 oryn – aýrýhanalyq, 30 –pallıatıvtik jáne 20 – kúndizgi bólimnen turady. Ortalyqta 6503-ten astam onkologııalyq naýqastar «D» esepte tursa, 2020 jyldyń 12 aıynda 1216 naýqas ómirinde alǵash ret esepke alyndy. Mekemeniń materıaldyq-tehnıkalyq jabdyqtalý kórsetkishi – 82.59 paıyz.
2020 jyly ýltradybystyq skalpel, pasıentterdi baqylaýshy monıtor, «CHS-1500» operasııalyq ústeli, ýltradybystyq «Afınıtı-70», ýltradybystyq skanerleý «CX-50», «Prostar» flıýorografııalyq jabdyq, ottegi terapııasynyń jabdyqtary, t.b., qajetti quraldar satyp alyndy. Búginde ortalyqqa halyqaralyq standarttarǵa saı onkologııalyq emdeý kórsetkishin arttyrý maqsatynda memlekettik-jekeshelik áriptestik aıasynda PET jáne sáýlelik jelilik jyldamdatqysh quraldaryn ornalastyrý josparlanýda.