Aıaqkıimderdiń zańsyz ımporttalýyna jol bermes úshin arnaıy DataMatrix kodymen tańbalandy, dep habarlaıdy Egemen.kz Sıfrlyq ekonomıkany damytý ortalyǵynyń baspasóz qyzmeti.
DataMatrix kody óndiris barysynda taýardyń ár partııasyna berilgen. Onda óndirýshi, ımporttaýshy, taýar partııasynyń serııalyq nómiri týraly sandyq aqparat jáne onyń tasymaldanýyn baqylaý úshin qajetti basqa da málimetter kórsetildi. «Bul kodty krıptaqorǵanystyń arqasynda qoldan jasaý múmkin emes», dep jazylǵan habarlamada.
Aıaqkıim taýarlaryn tańbalaý boıynsha pılottyq joba sátti júzege asty. Oǵan 5 qazaqstandyq óndirýshi men 16 ımporttaýshy qatysty.
«Joba aıasynda «KazlegProm-Almaty», SAMHAT, ZShoesKZ, Almaty Eco Trade Company, «TarazKojObýv» sııaqty aıaqkıim fabrıkalary 2019 jyldyń 30 shildesinen bastap 31 jeltoqsanyna deıin óz taýarlaryn arnaıy DataMatrix kodymen tańbalady. Joba aıasynda Qytaı, Túrkııa, Ýkraına Ispanııadan aıaqkıim ımporttaýshylary da óz ónimderin tańbalady. Olardyń arasynda «Spesobývtorg», «Spenısh rıteıl Kazahstan», Uterque Kazakhstan jáne taǵy basqa kompanııalar bar», deıdi mamandar.
Tańbalanǵan aıaqkıim Taýarlardy tańbalaý men qadaǵalaýdyń aqparattyq júıesine (TTQAJ) engizilgen.
«Keıin ónimder satý oryndaryna túsip, aınalymnan shyǵaryldy. Endi taýardy óndiristen bastap, sońǵy tutynýshyǵa satýǵa deıingi barlyq prosesti TTQAJ -da baqylaýǵa bolady», delingen habarlamada.
Eske salaıyq, 2019 jyly Qazaqstan Eýrazııalyq ekonomıkalyq odaq aýmaǵynda taýarlardy sáıkestendirý quraldarymen tańbalaý týraly kelisimdi ratıfıkasııalady. Aıaqkıim taýarlaryn tańbalaý jáne qadaǵalaý boıynsha pılottyq jobany engizý jónindegi jol kartasyn Indýstrııa jáne ınfraqurylymdyq damý mınıstrligi ázirlegen edi.
Aıta keteıik, 2020 jyldyń shildesinde Reseı aıaqkıimderdi mindetti tańbalaýdy engizdi. Nátıjesinde eldegi aıaqkıim naryǵynyń kólemi birneshe esege ósken (alǵashqy aılarda ǵana – resmı málimet)