11 aqpanda Qazaqstan Respýblıkasynyń Tuńǵysh Prezıdenti – Elbasynyń jańa mýzeıinde Qazaqstan Respýblıkasynyń eńbek sińirgen qaıratkeri, belgili keskindemeshi Kámil Mollashevtiń shyǵarmalar katalogynyń tusaýkeseri jáne jeke kórmesiniń ashylý saltanaty ótti.
«Búgin elimizdiń belgili qylqalam sheberi Kámıl Mollashevtiń jeke kórmesine kelgenderińizge alǵysymdy bildiremin. Qazaq beıneleý ónerinde Kámil aǵamyzdyń orny bólek. Onyń shyǵarmashylyǵyn elimizde ǵana emes, shetelde de jaqsy tanıdy ári baǵalaıdy. О́ıtkeni Kámil Mollashev ózindik qoltańbasy bar iri sýretshilerdiń biri. Onyń óneri men týyndylary tańǵajaıyp estetıkalyq ǵana emes, tereń fılosofııalyq mazmun turǵysynan da erekshe», dep atap ótti kórmeni ashqan Elbasy kitaphanasynyń dırektory Baqytjan Temirbolat.
Mádenıet jáne sport mınıstri Aqtoty Raıymqulovanyń quttyqtaý hatyn vıse-mınıstr Nurqısa Dáýeshov oqyp berdi:
«Qurmetti Kámil Ýálıhanuly! Sizdi Nur-Sultan qalasynda «Kámil Mollashevtiń óner álemi» atty jeke kórmeńizdiń ashylýymen shyn júrekten quttyqtaımyn! Qazaqstan Respýblıkasynyń Mádenıet jáne sport mınıstrligi Sizge elimizdiń mádenıetine, sonyń ishinde kórkemsýret ónerine qaltqysyz qyzmet etkenińiz úshin shyn júrekten alǵysyn bildiredi», dedi ol.
Kesh barysynda avtograf-sessııa da jasaldy. K.Ý. Mollashevtiń katalogy Qazaqstan Respýblıkasy Mádenıet jáne sport mınıstrligi men «Astana» halyqaralyq ýnıversıtetiniń qoldaýymen basylymǵa shyqqan.
«Kámil Ýálıhanuly, bizdiń ýnıversıtette úsh jylǵa jýyq jumys istep, onyń professory retinde bizdiń jumysymyzǵa shyǵarmashylyqtyń erekshe lebin ákelgenin aıtqym keledi. Onyń jasampazdyqty jalǵastyryp, bizdiń oqý ornynda jas talanttardy oqytatyny biz úshin úlken qurmet. Bul kórme men onyń katologynyń jaryqqa shyǵýy avtordyń shyǵarmashylyq kezeńdegi ózindik esebindeı. Kámil Ýálıhanuly, sizdiń eń keremet kartınalaryńyz jáne eń úzdik oqýshylaryńyz áli alda ekenine senimdimin, dedi «Astana» Halyqaralyq ýnıversıtetiniń prezıdenti Serik Irsalıev.
Is-sharaǵa Avstrııa, Belarýs, Nıderland, Germanııa, Reseı, Japonııa, Úndistan, Chehııa, Qyrǵyzstan, Kýveıt, Soltústik Makedonııa, Tatarstan elshileri men basqa da dıplomatııalyq korpýstyń ókilderi, galereıalar, mýzeıler men mádenı ortalyqtardyń basshylary, kórnekti sýretshiler, ónertanýshylar jáne óner qaıratkerleri qatysty.
«Kámil Mollashev – erekshe kózqarasy bar adam, naǵyz keskindeme sheberi. Ol óte názik salady, sonymen birge anyq ári shynaıy. Onyń barlyq shyǵarmalarynda onyń jan-dúnıesi seziledi. Meniń oıymsha, bul sheberdiń kartınalaryn kórgenderdiń bári onyń shyǵarmashylyǵynan lázzat alyp, talantyna tánti bolady», dep atap ótti Nıderland Koroldiginiń Qazaqstan Respýblıkasyndaǵy Tótenshe jáne О́kiletti Elshisi Andre Karstens.
Kórmede sýretshiniń 1974-2017 jyldar aralyǵynda jaryq kórgen 30-ǵa jýyq jumysy usynyldy. Janr, stıl turǵysynan sanalýan týyndylar sheberdiń darynyn aıshyqtap, «Kámil Mollashevtiń óner álemin» ashty.
Kórme 2021 jyldyń 27 aqpanyna deıin jalǵasady