Túrkistannan Qaraǵandy óńirine áskerı boryshyn óteýge barǵan 17 jastaǵy sarbaz qaıtys boldy, dep habarlaıdy Egemen.kz
Ramazan Jaqyptyń ata-anasy uldarynyń ólimine sene alar emes. Ata-anasynyń aıtýynsha, bozbalanyń jaǵdaıy ekpe salǵannan keıin kúrt nasharlap ketken. Dese de Abaı aýdanyndaǵy Ultyq ulannyń áskerı bólimi sarbazǵa eshqandaı ekpe saldyrmaǵandaryn aıtady.
«Ol kádimgi aýylda qara jumys istep, mal qarap júrgen deni saý bala ǵoı, eshqashanda onyń júregi aýyrǵan emes. Deni saý bala ǵoı…», dedi marqumnyń anasy Altynaı Qulataeva.
Altynaı Qulataeva balasymen 10 kún buryn sóıleskenin aıtady. Ol kezde balasy anasyna tamaǵynyń ekpe saldyrǵannan keıin isip ketkenin habardar etedi. Al ekinshi aqpanda tańǵy segizde Ramazan álsirep turǵanyna shaǵymdanǵan. Ile-shala bir-eki kún qaıta habarlasqan kezde ulynyń jaǵdaıy kúrt nasharlap, jansaqtaý bóliminde jatqyzylǵanyn esitedi.
Alaıda ıýólimshedegiler jaýyngerge eshqandaı ekpe salmaǵandyryn aıtady. Olardyń aıtýynsha, sarbaz menıngıtten qaıtys bolǵan.
«Tańǵy segizde bastaldy. Onyń aldynda túnde turyp jatqany kórinip tur, kameramen qaraǵanda. Tańǵy segizde dostary kelip aıtty. Ramazannyń jaǵdaıy nasharlap jatyr qarańyzshy dep. Odan keıin birden bizdiń dárigerler sol aýrýhanaǵa apardy. Saǵat 08:50-de aýrýhanada boldy. Saǵat 11:00-de qaıtty degen habar keldi», dedi 6505 áskerı bólimshesi komandırdiń orynbasary Arman Seıitov.
Qazir 6505 áskerı bólimi karantındik rejimde jumys isteıdi. Marqummen baılanysta bolǵandar tekserilip, ǵımaratty tolyǵymen zalalsyzdandyrǵan. Aıta ketsek, osydan eki jyl buryn dál osy áskerı bólimde Talǵardan kelgen sarbaz ózine oq atyp, qaıtys bolǵan edi.