Nur-Sultan qalalyq Polısııa departamenti ótken demalys kúnderi qalada karantın talaptaryn buzǵan 10 nysandy anyqtady, dep habarlaıdy Egemen.kz
Nur-Sultan qalalyq Sanıtarııalyq-epıdemııalyq baqylaý departamentiniń ókilderi, polısııa qyzmetkerleri bar mobıldi top karantın sharalarynyń saqtalýyn qadaǵalaý úshin júzden astam kásipkerlik sýbektisin tekserip shyqqan.
Nátıjesinde, karantın rejimin buzǵan meıramhana, dámhana-bar, dúken syndy 10 nysandy anyqtaǵan.
«Atap aıtqanda, Balqantaý kóshesi boıyndaǵy «Baqsaraı» meıramhanasyn tekserý barysynda eki kún qatarynan 50 jasqa tolý mereıtoıy men úılený toıynyń ótkeni anyqtaldy. Birinshi kúni qoldanystaǵy tyıymǵa qaramastan, meıramhana zaly qonaqtarǵa lyq toly bolǵan jáne karantın sharalary saqtalmaǵan. 80-nen astam qonaq án salyp, bı bılep, shekteýlerdi elemeı kóńil kótergen. Ekinshi kúni de dál osy jerde úılený toıy ótip jatqan. Mobıldi top kelgennen keıin toıǵa jınalǵandar tez arada tarap ketti» delingen departament aqparatynda.
Shekteý sharalaryn buzǵandardyń ústinen materıal jınaqtalyp, QR Ákimshilik quqyq buzýshylyq týraly kodekstiń 425-babymen olardy jaýapqa tartý úshin qalalyq Sanıtarııalyq-epıdemııalyq baqylaý departamentine jiberildi.