Bul týraly О́ńirlik kommýnıkasııalar qyzmetiniń brıfınginde «Áleýmettik medısınalyq saqtandyrý qory» KeAQ Almaty qalasy boıynsha fılıalynyń dırektory Tileýhan Ábildaev habarlady, dep habarlaıdy Egemen.kz
Jurtshylyqty saqtandyrý statýsymen qamtamasyz etý – MÁMS júıesindegi ózekti máselelerdiń biri. 1.02.2021 jylǵy málimet boıynsha Almatydaǵy 1,9 mln turǵynnyń 81,5% saqtandyrylǵan.
Jergilikti atqarý organdarymen birge júrgizilip jatqan jumystar oń nátıjesin berip te jatyr. Máselen, ótken jyldyń 1 tamyzynda Almatyda saqtandyrylmaǵandardyń úlesi 22,6% bolsa, jyl sońynda 15% deıin qysqardy. Búgingi tańda bul kórsetkish 18,5% ósip otyr. MÁMS úshin jarnalar men aýdarymdardyń túsýi jalǵasýda. MÁMS júıesi engizilgen sátten bastap (2017 jylǵy 1 shilde) 2021 jylǵy 15 aqpanǵa deıin 529,1 mlrd teńge tústi. Barlyq qarajattyń besten bir bóligi burynǵysynsha Almatyǵa tıesili. Jalpy, Almatydan túsken túsimderdiń jalpy somasy 99,5 mlrd teńgeden asty. Túsimderdiń negizgi bóligi nemese 79 mlrd teńgeden astam-bul jumys berýshilerdiń aýdarymdary, qalǵan 20,5 mlrd teńge-jeke kásipkerler men azamattyq-quqyqtyq sıpattaǵy sharttar boıynsha jumys isteıtin adamdardyń jarnalary.
Sondaı-aq aı saıyn BJT tóleýshilerdiń ósýi baıqalady. 2019 jyldyń basynan bastap ózin-ózi jumyspen qamtyǵan 197 myńnan astam almatylyq 392,3 mln teńge kóleminde biryńǵaı jıyntyq tólem tólegen.2021 jylǵa Almaty qalasynyń densaýlyq saqtaý salasyn qarjylandyrý 186,8 mlrd.teńgeni qurady, onyń ishinde TMKKK sheńberinde 109,5 mlrd teńge, MÁMS júıesinde 77,3 mlrd. teńge. Qordyń Almaty qalasy boıynsha derekter bazasynda barlyǵy 317 ónim berýshi (jetkizýshi) bar.
Aǵymdaǵy jylǵy 10 aqpandaǵy jaǵdaı boıynsha Almaty qalasy boıynsha TMKKK sheńberinde jáne MÁMS júıesinde qyzmetter kórsetýge 183 densaýlyq saqtaý sýbektilerimen jalpy somasy 179,2 mlrd teńgege sharttar jasaldy, onyń ishinde 44% - memlekettik menshik nysany, 56% - jeke menshik ıeleri.TMKKK sheńberinde 104,3 mlrd teńge somasyna 152 densaýlyq saqtaý sýbektilerimen qyzmetter kórsetýge sharttar jasaldy, onyń ishinde 47% memlekettik, 53% jeke menshik nysany. MÁMS júıesinde 74,9 mlrd teńge somasyna 163 densaýlyq saqtaý sýbektilerimen sharttar jasaldy, onyń 45%-y memlekettik, 55%-y jeke menshik nysany.Jalpy, MÁMS reformasy halyqtyń densaýlyqqa jumsaıtyn shyǵyndaryn qysqartýǵa baǵyttalǵan. Máselen, MÁMS iske qosylǵaly beri buryn azamattar qaltasynan tólep kelgen baǵasy qymbat qyzmetter qoljetimdi bola bastady.
«О́tken jyly saqtandyrý paketi sheńberinde kórsetilgen KT/MRT, PTR syndy t.b. qyzmetter sany 2019 jylmen salystyrǵanda 3 ese artty. Mysaly, 2020 jyly Almaty qalasy boıynsha 41 myń 540 KT/MRT jasalǵan. Oǵan 543,1 mln teńgeden astam qarajat tólendi. Sonymen qatar, onkologııalyq syrqatty anyqtaý maqsatynda jasalatyn 7 myń PET-dıagnostıka qyzmeti kórsetilgen (pozıtrondy-emıssıondyq tomografııa). Oǵan 1,2 mlrd teńge tólendi», dedi T.Ábildaev.
MÁMS engizilgeli beri medısınalyq reabılıtasııaǵa, jalpy, medısınalyq kómektiń barlyq túrlerine bólinetin qarajat kólemi edáýir artqany baıqalady. Mysaly, bastapqy medısınalyq-sanıtarlyq kómekti qarjylandyrý deńgeıi 7%, profılaktıkalyq tekserýler 162%, konsýltatıvtik-dıagnostıkalyq qyzmetter 49%, onkogematologııa 17%, gemodıalız 6%, stasıonardy almastyratyn kómek 13%, stasıonarlyq kómek 8%, qalpyna keltirýge baǵyttalǵan em-dom 63%, pallıatıvtik kómek - 12% ósti.