Qarǵaly aýdany Qaıraqty eldi mekeniniń turǵyny, úsh balanyń ákesi Zakır Absalıamov on saýsaǵynan óneri tamǵan sheber. Negizgi mamandyǵy elektrdánekerleýshi bolsa da, ol aýyldyń sánin keltirip turǵan nysandardy óz qolymen turǵyzyp, Qaıraqtynyń kórkeıýine úles qosyp júrgen azamat, dep habarlaıdy Egemen.kz.
Osydan jıyrma jyl buryn Bashqurtstannan Qarǵaly aýdanynyń Qaıraqty aýylyna jeke kásibiniń sharýasymen kelip qonystanyp qalǵan Zakır Absalıamov bul kúnde úsh balanyń ákesi, bes nemereniń atasy. Osy aýyldyń Zııada esimdi boıjetkenimen bas qosyp, turaqtap qalady.
– Qazir balalarym ósti, bári otbasyly, jan-jaqta turady. Aqtóbe qalasynan nemerelerim jıi keledi. Ádette qysqy, jazǵy kanıkýldy bizdiń qasymyzda ótkizetin eresek nemerelerim aǵashtan jasaǵan músinderge qatty qyzyǵyp, qasymda júrip úırengisi keledi. Bes jastaǵy eń kishkentaı nemerem qaladan kelgende sharbaqtaǵy qar men muzdan soǵylǵan músindi qyzyq kóredi. О́z basym qysta nemerelerimmen aqqala soqqandy unatamyn. Eki-úsh jyldan beri jeltoqsannyń sońǵy túni Jańa Jyldyń sımvolıkalyq beınesin keskindep, muzdan músin oıýdy ádetke aınaldyrdym. Bıylǵy sıyr jyly elimizge tynyshtyq, qut-bereke ákelsin, qıyndyqty birge eńserip, jaqsy kúnge jeteıik degen tilekpen úıdiń aýlasyna ógizdiń músinin muzdan oıyp turǵyzdym, deıdi Zakır Absalıamov.
Kórshileri áýelde jeltoqsannyń sońǵy kúni túrli ań-qustyń músinin qardan soǵyp, muzdan oıyp álekke túsip jatqan Zakırdiń isin qyzyq kórgen. Degenmen, kóz tartarlyqtaı sulý ań-qustardyń qatarlasa tizilgenin kórgen olar jyldyń sońǵy túni Zakırge qolǵabysqa keledi. Tipti keıbir kórshileri úıleriniń janynda ań-qustardyń beınesin soǵa bastaǵan. Osylaısha Qaıraqtydaǵy muzdan músin jasaýdyń sheberlik sabaqtary tekke ketken joq. Endi jeltoqsannyń sońǵy túni Absalıamovtar úıiniń janyndaǵy músin soǵý merekesine Qaıraqty aýylynyń turǵyndary biri qalmaı jınalatyn boldy.
Zakırdiń qolónerge degen qulshynysy sonaý bala kezinen oıanǵan eken. Kishkentaıynan aǵashty jonyp, ár túrli beıneler jasaýdy jaqsy kórgen ol orta mektepti bitirgen soń Bashqurtstandaǵy kórkemsýret ýchılıshesine oqýǵa túsýdi josparlaıdy. Biraq kásibı sýretshi-bezendirýshi bolýǵa múmkindigi bolmaı qalsa da, osy kezge deıin áýesqoılyǵyn tastamaıdy. Ol úıiniń aýlasyndaǵy aǵashtan soqqan sheberhanasynda qoly bosaǵan kezde aǵashtan túrli beıneler jasaıdy.
Aǵashtan túıin túıgen sheber Qaıraqtysyn jaqsy kóredi. О́te eńbekkqor jannyń aýlasynda synyq shóp te jatpaıdy, jumystan qoly bosaǵanda jazdaı sharbaǵyndaǵy jemis aǵashtary men gúlderin baptaıdy. Bul kisiniń úıiniń zaty óz ornynda, qısaıǵan sharbaq, topsasy túsip qalǵan syqyrlaýyq qaqpa degen bul úıde joq. Qoly altyn azamat aýyl turǵyndarynyń elektr jelilerin jóndep, symdaryn jalǵap qana qoımaı, sharbaqtarynyń qısaıǵan jerin de túzep beredi. Qaıraqty aýylynyń kireberisinde dala búrkiti beınelengen stella tur. Qanatyn qomdap, ushqaly turǵan ór de tákappar dala búrkitin Zakır aǵashtan jasap, aýylǵa syıǵa tartqan. «Búrkit – bostandyq pen táýelsizdiktiń» beınesi deıdi sheber.
Zakır Qaıraqty aýylynyń ortasynda shaǵyn balalar alańyn da óz qolymen turǵyzdy. «Aýylymyzda arnaıy jabdyqtalǵan oıyn alańy joq. Jazǵy kanıkýlda balalar jattyqsyn degen oımen dánekerlegish apparattyń kómegimen birneshe týrnık, úsh átkenshek jasadym. Aýyldastarym qoldan jasalǵan qondyrǵylardy oıyn alańyna myqtap bekitti», deıdi Zakır.
Qaıraqty aýylynyń turǵyndary qoly altyn azamatqa dán rıza. Aýyldyń taza, kórikti, sándi bolýyna kóp úles qosyp júrgen azamat eńbegin buldamaıdy, úndemeı-aq kóp is tyndyryp júr.