IIM ýchaskelik pýnktter men stasıonarlyq polısııa beketteri jelisin kóbeıtip jatyr, dep habarlaıdy Egemen.kz Polisia.kz saıtyna silteme jasap.
Ishki ister mınıstri Erlan Turǵymbaev Aqtóbe oblysyna jumys sapary aıasynda Polısııa departamentiniń birqatar nysanyn aralady. Olardyń qatarynda Aqtóbe qalasynyń eń jandanǵan oryndarynyń biri – Ortalyq dańǵyldaǵy sport saraıy aýdanynda ornalasqan modýldik stasıonarlyq beket bar. Onda polıseılerdiń qyzmet atqarýyna jáne azamattardy táýlik boıy qabyldaýǵa qajetti barlyq jaǵdaılar jasalǵan.
Mınıstr halyqtyń qaýipsizdigi men tynyshtyǵyn qamtamasyz etý úshin jergilikti atqarýshy organdardyń polısııany qoldaýyn joǵary baǵalady.
Damyǵan elderdiń tájirıbesi boıynsha qazirgi zamanǵy stasıonarlyq polısııa beketteri neǵurlym krımınogendi ýchaskelerde ornatylýda. Aqtóbede osyndaı bes beket bar.
– El Prezıdenti Qasym-Jomart Kemeluly Toqaev tapsyrǵandaı, servıstik modeldiń negizgi elementi “jurqa jaqyn polısııa” bolýy tıis. Osy qaǵıdatty is júzinde iske asyra otyryp, biz qoǵamdyq oryndarda quqyq tártibi organdarynyń turaqty bolýyna qol jetkizemiz. Azamattar ózderin qaýipsiz sezinip, polısııaǵa júginý kezinde eshqandaı problema bolmaýy kerek. Búginniń ózinde biz nátıjelerdi kórip otyrmyz – stasıonarlyq beketter ornatylǵan jerlerde quqyq buzýshylyqtar sany aıtarlyqtaı azaıdy, – dep atap ótti vedomstvo basshysy.