Aqtóbede polısııa qyzmetkerleri 22 keli esirtki tasymaldaǵan qyrǵyzstandyqty ustady, dep habarlaıdy Egemen.kz.
Aqtóbe oblystyq polısııa departamenti Esirtki qylmysyna qarsy is-qımyl basqarmasynyń qyzmetkerleri «Mıgrant» jedel-izdestirý sharasyn ótkizdi. «Samara-Shymkent» tas jolynyń 972 shaqyrymynda kólik quralyn sanksııasyz tintip, Bishkek qalasynda turatyn Qyrǵyzstannyń 44 jastaǵy azamaty aıdap kele jatqan júk kóliginen jalpy salmaǵy 22 keliden asatyn «marıhýana» tabylyp, tárkilendi.
Aqtóbe oblysynyń polısııa departamenti Qylmystyq kodekstiń 296-babynyń 4-bóliginiń sanksııasyna sáıkes (Asa iri mólsherde esirtki zattaryn zańsyz saqtaý) tergeýdi bastady. Esirtki quraldaryn, psıhotroptyq zattardy, sol tektesterdi ótkizý maqsatynsyz zańsyz daıyndaý, óńdeý, satyp alý, saqtaý, tasymaldaýǵa úsh jyldan jeti jylǵa deıingi merzimge bas bostandyǵynan aıyrý jazasy qarastyrylǵanyn eske salady.