Almatyda dúnıejúzilik týberkýlezben kúres kúnine oraılastyrylyp, týberkýlezben kúres aıy jarııalandy. Pandemııany eskere otyryp, is-sharalar onlaın túrde ótkiziledi. Bul týraly О́KQ brıfınginde QR Densaýlyq saqtaý mınıstrliginiń Ftızıopýlmonologııa ulttyq ǵylymı ortalyǵynyń dırektory Málik Ádenov habarlady.
«Basty mindet – «týberkýlezdiń úkim emes ekenin» aıtý. Bastamanyń maqsaty – halyqtyń týberkýlezge qarsy is - sharalar týraly jáne eldegi týberkýlezdi tekserý men emdeýdiń turǵyndar úshin qoljetimdi jaǵdaılary týraly habardar bolýyn arttyrý», - dedi ol.
Búkil álemde atap ótiletin kúnniń mindeti barlyq turǵyndarǵa týberkýlez máselesi bizdiń kez kelgenimizge áser etýi múmkin ekendigin jetkizý, sondyqtan aksııanyń sátti bolýy ár adamnyń jeke ustanymyna baılanysty. Osyǵan baılanysty týberkýlez degenimiz ne, onyń neden bastalatynyn, qalaı anyqtalatynyn jáne qalaı emdeletinin túsindirý qajet.
«Eger týberkýlezge tán belgiler bolsa, onda siz medısınalyq uıymǵa baryp, tegin em ala alasyz», - deıdi Málik Ádenov.
Sondaı-aq spıkerler birqatar usynystar berdi. Týberkýlezben aýyrmaý úshin salaýatty ómir saltyn ustaný mańyzdy. Sonymen qatar, qala turǵyndarynyń jeke gıgıena jáne aldyn alý sharalaryn - betperde rejımi men áleýmettik qashyqtyqty saqtaýy COVID-19 sııaqty aýa tamshylarymen beriletin týberkýlezdiń taralýyn boldyrmaýǵa da oń áser etti.
Bir aılyq nasıhat kezinde oqý oryndarynda jáne basqa da uıymdarda kúsheıtilgen aqparattyq-túsindirý jumystary júrgiziledi, rolıkter kórsetiledi, taqyrypqa saı úzdik jarııalaý, mektepterde osy taqyrypty durys túsindirýge qatysty konkýrstar ótkiziletin bolady. Bul týberkýlez týraly aıtýdyń qol jetimdi ádisi.
«Búgingi tańda barlyq medısınalyq uıymdar men Almaty qalasynyń turǵyndary ınfeksııalyq baqylaý men jeke qorǵaný quraldarynyń ne ekenin túsinedi», - dep atap ótti Almaty qalasynyń Ftızıopýlmonologııa ortalyǵynyń dırektory Janar Sápıeva.
Brıfıng barysynda kelesi 5 jylǵa arnalǵan jańa keshendi jospardyń engizilgeni týraly habarlandy.
«Biz bıyl 2021-2025 jyldarǵa arnalǵan jańa keshendi jospar ázirlep, qabyldaýdy josparlap otyrmyz, onda barlyq is - sharalar jazylady, soǵan sáıkes biz bolashaqta jumys isteıtin bolamyz», - dep habarlaıdy Málik Ádenov.
Aıta ketý kerek, týberkýlezge qarsy kúres jónindegi 2014 - 2020 jyldarǵa arnalǵan keshendi jospardy iske asyrý nátıjesinde týberkýlez boıynsha turaqty epıdemıologııalyq jaǵdaı baıqalady. Sońǵy 10 jylda týberkýlezben aýyrý 2,3 ese azaıdy, 2009 jylǵy 100 myń turǵynǵa shaqqanda 105,3-ke qaraǵanda, 2020 jyly 100 myń turǵynǵa shaqqanda 35,7-ni qurady, 2020 jyldyń qorytyndysy boıynsha týberkýlezdiń taralýy 100 myń turǵynǵa shaqqanda 49,3-ti qurady. О́lim kórsetkishi 6 esege tómendedi.