Shymkent qalasynyń ákimdiginde 1 naýryz – Alǵys aıtý kúnine arnalǵan is-shara bolyp ótti. Epıdemıologııalyq ahýalǵa baılanysty qalanyń ár jerinde uıymdastyrylǵan merekelik quttyqtaýlar men konserttik baǵdarlamalar onlaın rejımde kórsetildi.
Saltanatty jıynǵa qatysqan qala ákimi Murat Áıtenov barsha qala turǵyndaryn aıtýly merekemen quttyqtap, Shymkenttiń damýy men kórkeıýine úles qosqan jerlesterine alǵysyn jetkizdi.Saltanatty jıynǵa qatysqan qala ákimi Murat Áıtenov barsha qala turǵyndaryn aıtýly merekemen quttyqtap, Shymkenttiń damýy men kórkeıýine úles qosqan jerlesterine alǵysyn jetkizdi.
«Barshańyzdy kóktem shýaǵymen kelgen 1 naýryz - Alǵys aıtý kúnimen shyn júrekten quttyqtaımyn! Alǵys aıtý kúni – bul qıyn kezeńderdi basynan ótkergen elimizdiń barlyq azamattarynyń bir-birine degen qurmet kúni. Egemendigimizdiń 30 jylynda tolaǵaı tabystarǵa jettik. Bul jetistikke Elbasynyń dara kóshbasshylyǵy men halqymyzdyń danalyǵynyń jáne parasatynyń, birligi men yntymaǵynyń, otandastarymyzdyń qajyrly eńbeginiń arqasynda qol jetkizdik», dedi qala basshysy óz quttyqtaý sózinde.
Áýeli ekrannan ult pen ulystyń ótken kezeńdegi tarıhy dáriptelgen tatýlyq pen kelisim týraly derekti fılm kórsetildi.
Sonymen qatar, QR Táýelsizdigine 30 jyl tolýyna oraı «Táýelsizdik» saıabaǵynan tikeleı efır arqyly Gavrelın Vladıslav pen Beksultan Álıevtiń alǵys aıtý sózi usynylyp, túrli etnos ókilderi aspaptarynyń oryndaýyndaǵy Qurmanǵazynyń kúıi «Balbyraýyn» oryndaldy.
Al egemendigimizdiń 30 jyldyǵyna arnalǵan 30 etnos jastarynyń «Shymkent Arbat» alańynan «Biz qazaqsha sóıleımiz» atty reportajy usynylsa, kesh sońynda bashqurt etnosynyń ókili, belgili ánshi Zeıtýna Shafıkova Sh.Qaldaıaqovtyń «Arystyń jaǵasynda» áni shyrqaldy.
Sonymen birge alǵys aıtý kúninde túrli etnos ókilderi is-sharaǵa qatysyp otyrǵan azamattar men qalamyzdyń turǵyndary kóp shoǵyrlanǵan alaptarynda qurt taratý rásimin uıymdastyrdy. Bul aksııa arqyly olar ózderiniń yqylastary men alǵystaryn jetkizbek. Qurt qorapshasynyń syrtynda «Myń alǵys» degen jazý jazylǵan.