О́skemendegi óner mýzeıinde ulttyq úlgide jazylǵan kartınalar men qolóner buıymdary toptastyrylǵan «Naýryz-fılosofııa» atty kórme ashyldy. Kórermen qaýymǵa mýzeı qorynan jáne sýretshilerdiń jeke kolleksııasynan alynǵan jumystar usynyldy.
Táýelsizdiktiń 30 jyldyǵyn merekeleýge oraı naýryz aıy Qazaqstannyń ulttyq dástúri men mádenıetiniń merekesi retinde bekitilgeni belgili. Sondyqtan da Shyǵys Qazaqstan oblysynda Naýryz toıyna ázirlik erte bastaldy.
«Naýryz-fılosofııa» kórmesin uıymdastyrýshylar mýzeıdiń baǵanaly zalyna qazaq halqynyń salt-dástúrin, burynǵy tirshiligin aıshyqtaıtyndaı týyndylardy jınaqtady. Ár jumys ózinshe erekshe. Sháńgereı Ybyraevtyń, Alfııa Mýhamedıanovanyń akvarelmen móldiretip jazǵan sýretterine úńilmeı ótý múmkin emes. Kelýshiler de bul kartınalarǵa jaqynnan bir qarap, sál keıin sheginshekteı taǵy qyzyqtady. Sonymen qatar Gúlnar Bekberdınova, Tatıana Leonovalardyń Naýryz merekesine arnalǵan grafıkalyq kompozısııalary da fılosofııalyq turǵyda tereń maǵynaǵa ıe. Al tarıhı janrda jazyp júrgen Qaısan Qadyrbekovtiń polotnolary kórmeniń kórkin ashyp turdy desek, artyq aıtpaǵandyǵymyz.
Sýretshiler odaǵynyń múshesi Qaısan Qadyrbekov Tarbaǵataı aýdany, Tuıyq aýylynyń týmasy. О́kinishtisi, 1960 jyldary Buqtyrma sý qoımasy ashylyp, týǵan aýyly sý astynda qalyp ketken. Qylqalam sheberi týǵan aýylynan ajyrap qalǵandyqtan da sýretshilik joldy tańdaǵan sııaqty.
– Shynyn aıtqanda, týǵan aýylymnyń sý astynda qalǵany janyma qatty batty. Sol kezderi tebirenisten, saǵynyshtan aýyldyń sýretin salatyn edim. Keıin osy baǵytta oqý oqydym, bilim aldym. Búginde tarıhı janrda azdy-kópti kartınalarym bar, – deıdi sýretshi.
Qaısan Rahmetulynyń eńbekteri Qazaqstan mýzeılerinde ǵana emes, alys-jaqyn shetelderge de satylǵan. Aıtýynsha, eńbekterine suranys kóp. О́ner mýzeıine usynǵan jumystary da kópshilktiń nazaryn aýdardy. Kópshilik deımiz, sanıtarlyq talaptarǵa baılanysty kóp kórermen jınalmady. Biraq mýzeı qyzmetkerleri bul kórmege áleýmettik jelide onlaın-ekskýrsııa júrgizip, ónersúıer qaýymǵa tanystyrmaq nıette.