Dúısenbiden seısenbige qaraǵan túni Qazaq onkologııa jáne radıologııa ǵylymı-zertteý ınstıtýtynyń Gematologııa jáne súıek kemigin transplantasııalaý ortalyǵynyń professory, tálimgeri, onkolog-dárigeri Raıymqul (Roman) Qaraqululy Qaraqulov ómirden ozdy, dep habarlaıdy Egemen.kz
Bul Qazaqstannyń barlyq medısınalyq jáne onkologııalyq qoǵamdastyǵy úshin orny tolmas qaıǵy.
Ol 1942 jyly 13 tamyzda Ońtústik Qazaqstan oblysy, Qazyǵurt aýdany, Jańa bazar aýylynda dúnıege kelgen. 1967 jyly Almaty memlekettik medısına ınstıtýtynyń pedıatrııa fakýltetin bitirgen.
1967 jyldyń tamyz aıynan 1968 jyldyń shilde aıyna deıin Gýrev (qazirgi Atyraý) oblystyq aýrýhanasynda dáriger-hırýrg bolyp jumys istedi. Keıin Almaty memlekettik medısına ınstıtýtynyń fakýltettik terapııa kafedrasynyń assıstenti boldy. 1969 jyldyń tamyzynan bastap 1970 jyldyń tamyzyna deıin Baıkal áskerı okrýginiń áskerı bóliminde lazaret bastyǵy laýazymyn, sodan keıin 1970 jyldyń qyrkúıeginen bastap 1971 jyldyń qazanyna deıin avıasııalyq bólimniń ınjenerlik batalonynyń (MǴR, Ulan – Batyr qalasy) aǵa dárigeri bolyp qyzmet atqardy.
Ol 1971 jyly QazOjRǴZI-ǵa qarapaıym zerthanashy bolyp qyzmetke kelip, 1977 jyly kandıdattyq dıssertasııasyn sátti qorǵady, 1978 jyldan 1983 jylǵa deıin P.A. Gersen atyndaǵy Máskeý onkologııa jáne radıologııa ǵylymı-zertteý ınstıtýtynda taǵylymdamadan ótti. 1986 jyly Máskeý rentgen-radıologııa ǵylymı-zertteý ınstıtýtynda (Obnınsk q.) doktorlyq dıssertasııasyn sátti qorǵady.
1984 jyldan bastap gemoblastozdar bólimshesinde jumys istedi, QazOjRǴZI-da osy bólimsheni qurýdyń bastaýynda turdy. 1993 jyldan 1999 jylǵa deıin bólimshe basshysy, keıin hımıoterapııa bóliminiń meńgerýshisi bolyp jumys istedi. Sońǵy jyldary QazOjRǴZI-dyń Gematologııa jáne súıek kemigin transplantasııalaý ortalyǵynyń professor qyzmetin atqardy.
Onyń negizgi ǵylymı baǵyty «Isiktiń molekýlalyq-genetıkalyq erekshelikterin eskere otyryp, qaterli lımfomalardyń qaıtalanatyn jáne refrakterlik túrlerin emdeýde monoklonaldy antıdenelerdiń tıimdiligin zertteý» bolyp tabylady. Ǵylymı zertteýlerdi tabysty oryndaǵany úshin 1984 jyly KSRO ǴA Prezıdıýmynyń syılyǵymen marapattaldy.
2002 jyly Raıymqulǵa onkologııa professory ataǵy berildi, al 2009 jyldan bastap Halyqaralyq Aqparattandyrý Akademııasynyń (HAA) tolyq múshesi boldy.
Ǵylymı zertteýlerdegi jetistikteri úshin «KSRO ónertapqyshy» jáne «KSRO Densaýlyq saqtaý úzdigi» belgilerimen jáne «Eńbek ardageri» medalimen marapattaldy.
Professor Qaraqulov ınstıtýttyń qoǵamdyq ómirine belsendi qatysty, ınstıtýttyń Ǵylymı keńesiniń múshesi, kóp jyldar boıy kásipodaq komıtetiniń múshesi boldy, QazOjRǴZI-da «Nur Otan» partııasynyń bastaýysh partııa uıymyn basqardy. «Nur Otan» partııasynyń Tóraǵasy N.Á. Nazarbaevtyń atynan alǵys hatpen marapattaldy.
R.Q. Qaraqulov shet elderdiń ǵalymdarymen belsendi yntymaqtastyqta bolyp, halyqaralyq forýmdar men kongresterge qatysty. 2013 jyldan bastap lımforýmnyń (qaterli lımfomalar boıynsha) táýelsiz sarapshysy boldy.
Ol 350-den astam jumys jarııalady, onyń 50-i shetelde. Sonymen qatar, eki monografııanyń avtory, 10 avtorlyq kýálik, onyń ishinde 2 halyqaralyq mańyzy bar.
Raıymqul Qaraqulov – joǵary bilikti maman, kásibıligi, joǵary adamı qasıetteri, oryndaýshylyq tártibi úshin árdaıym áriptester men pasıentter arasynda laıyqty bedelge ıe bolǵan.
2020 jyldyń jeltoqsan aıynda QazOjRǴZI-dyń 60 jyldyǵyna oraı «Qazaqstan Respýblıkasynyń densaýlyq saqtaý isiniń úzdigi» tósbelgisimen marapattalǵan.