6 naýryzda túrikmen belsendileri Nıý-Iorktegi Times Square alańynda narazylyq aksııasyn ótkizip, el bıliginen ádil sot tóreligin surady jáne 14 jasar sportshy Súleıman Tursynbaevtyń ólimine kinálilerdi jazalaýdy talap etti, dep habarlaıdy Egemen.kz.
Aksııaǵa qatysýshylar kásibı sportshylarǵa áleýmettik jelilerde osy oqıǵa týraly únsiz qalmaýyn surady.
Narazy toptyń vıdeosy oppozısııalyq saıasatker Halmýrad Soıýnovtyń Youtube kanalynda jarııalandy.
Buǵan deıin bul aksııany 19 aqpanda Nıý-Iorkte BUU shtab-páteriniń aldynda ótkizý josparlanǵan bolatyn, biraq aýa raıynyń qolaısyzdyǵy men qalyń qardyń saldarynan is-shara toqtatyldy.
Esterińizde bolsa, 15 aqpanda 14 jasar túrikmen dzıýdoshysy Súleımen Tursynbaev aýyr soqqy saldarynan qaıtys bolǵany týraly habarlanǵan edi.
Bıylǵy jyldyń aqpan aıynyń basynda Súleıman Bahardende ótken dzıýdodan jarysta baq synaǵan. Sheshýshi jekpe-jektiń aldynda oǵan qarsylasy - Túrkimenstan ishki ister mınıstrligi joǵary oqý ornynyń jas kýrsanty jeńilýin suraǵan. Alaıda, Súleıman jekpe-jekte jeńiske jetip, óz salmaǵynda chempıon atanady.
Týrnır aıaqtalǵannan keıin birden belgisiz bireýler jeńimpaz jigittiń jattyqtyrýshysyn uryp-soqqan. Al Súleıman Tursynbaevty belgisiz baǵytqa alyp ketken. Soqqyǵa jyǵylǵan Súleımendi ótip bara jatqan adamdar kórip, jedel-járdem shaqyrǵan. Olar ony Ashhabadtaǵy aýrýhanalardyń birine aparady. Biraq dárigerler Súleımenge kómektesýden bas tartyp, astanadan 500 shaqyrym jerdegi turǵylyqty meken jaıyna jetkizgen. Jas jigit aýdandyq aýrýhanaǵa túsken soń, birneshe kúnnen keıin qaıtys boldy.
Kóz jumǵan balanyń ata-anasy oppozısııalyq saıasatker Halmýrad Soıýnovtyń Youtube kanaly arqyly prezıdent Gýrbangýly Berdimuhamedovke ótinish bildirip, isti tergeýdi jáne kinálilerdi jazalaýdy curaǵan bolatyn.