Hakim Abaıǵa taǵzym

Jıynǵa Qazaqstannan arnaıy saparmen kelgen Qazaqstan Respýblıkasynyń Mádenıet jáne sport mınıstri Aqtoty Raıymqulova bastaǵan mádenıet qaırat­ker­leri jáne óner adamdary, qyrǵyz tarapynan Qyrǵyz Respýblıkasynyń Mádenıet, aq­parat, sport jáne jastar saıasaty mınıstri Qaırat Imanalıev bas bolǵan ólkedegi mádenıet salasynyń jetekshileri qatysty.

– Keıingi jyldary qazaq-qyrǵyz qa­rym-qatynastary keń óris aldy, onyń ishin­de mádenı baılanys nyǵaıa tústi. Biz ortalyqty aralap kórip, onyń keńdigine, jasalymyna dán rıza boldyq, – dep sózin bastaǵan mınıstr Aqtoty Raıymqulova bıyl Qyrǵyzstanda ótetin Qazaqstannyń mádenıet kúnderi eki eldiń dostyǵyn bekemdeýge  aıtarlyqtaı úles qosaryn aıtty. 2022 jyly biz Qazaqstanda qyrǵyz máde­nıetiniń ókilderin kútetin bolamyz, – dedi mınıstr.

Abaı shyǵarmalarynyń qyrǵyz eline, qyrǵyz ádebıetine tıgizgen yqpalyna toq­talǵan mınıstr Qaırat Imanalıev jaqyn­da bolǵan eki memlekettiń basshy­lary kezdesýiniń aıasynda Qazaqstannyń Mádenıet jáne sport mınıstrligimen ózi jetekshilik etetin mınıstrlik arasynda yn­tymaqtastyqty damytý týraly kelisimge qol qoıylǵanyn, Qazaqstannyń mádenıet kún­deriniń Qyrǵyzstanda ótýine baılanys­ty daıarlyqtar júrgizip jatqa­nyn atap ótti.

Qazaqstannyń Qyrǵyzstandaǵy Tó­ten­­she jáne ókiletti elshisi Qaırat Nur­peıi­sov byltyrǵy Abaı jylynyń aıasynda kitap­hanada Abaı ortalyǵynyń ashylýy baýyr­las eki eldiń rýhanı ómirindegi zor oqıǵa bol­ǵanyna toqtalyp, osyndaı ortalyq bar­da Abaı nasıhaty jalǵasa beretinine senim bildirdi. Sondaı-aq elshi Nur-Sul­tan jáne Almaty qalalaryndaǵy ulttyq kitap­hana­lardyń Abaı ortalyǵyna 500-den as­­tam kitapty tartý etýge bastamashy bolǵan mınıstr A.Raıymqulovaǵa rızashylyǵyn bil­­dirdi.

Jıynda sóz sóılegen Qyrǵyz Res­pýb­­lı­kasynyń halyq ártisi, Qyrǵyz ulttyq akademııalyq opera jáne balet teatrynyń dırektory Kerim Turapov eki eldiń dos­tyǵyn nyǵaıtýda má­denı baılanys­tar basqa salalardaǵy qatynastarǵa qara­ǵanda óte mańyzdy ekenin, Qyrǵyz ult­tyq akademııalyq drama teatrynyń jetek­shisi Asylbek О́zúbekov ózderiniń M.Áýezovtiń «Eńlik-Kebek» pesasyn sahnalaýǵa ázir­lep jatqandaryn aıtty. Qyrǵyz kı­ne­ma­tografııa departamentiniń basshysy Muq­taly Bektenalıev Shyńǵys Aıt­ma­tovtyń shyǵar­malary boıynsha qazaq-qyr­ǵyz kór­kem fılmin túsirý jónin­de  usy­nysyn ja­sady.

Meımandar jaǵynan sóz sóılegen Qazaq­­stannyń eńbek sińirgen qaırat­ker­leri Aqan Ábdýálıev, Jeńis Seıdol­lauly jáne aqyn-jyrshy Baıanǵalı Álim­janov týysqan eki eldiń birligin arttyrýdaǵy mádenıettiń róline toqta­ldy. Jıynda Qyr­ǵyzstannyń «Dos­tyq» ordenimen marapattalǵan manasshy Baıan­ǵalı Álimjanovqa úlken qurmet kórsetilip, Prezıdent Sadyr Japarov Nur-Sultan qalasyna bar­ǵan saparynda oǵan ordendi óz qolymen tap­syr­ǵany aıtyldy.

Qazaqstandyq delegasııa Bish­kektegi Shyńǵys Aıtmatovtyń mu­ra­­jaı-úıine baryp, qalanyń shetindegi 1937 jyl­ǵy repressııa qurbandaryna ar­nal­ǵan «Ata-Beıit» keshenine taǵzym etip, gúl shoqtaryn qoıdy. «Sýpara» («Sypyra») etnokeshenin aralap kórdi. Tús aýa qazaqstandyq meımandar Qyr­ǵyzstannyń bas telearnasy QTRK-da tikeleı efırde bir saǵat qonaq boldy.

Is-sharalar keshqurym A.Maldybaev atyndaǵy Qyrǵyz ulttyq akademııalyq opera jáne balet teatrynda jalǵasty. Konsert bastalar aldynda Qyrǵyz Res­pýb­lıkasy Prezıdentiniń apparat jetekshisi Súıúnbek Kasmambetov Pre­zıdent Sadyr Japarovtyń Abaıdyń 175 jyldyǵyna arnalǵan quttyqtaýyn oqyp berdi. Onda Abaı Qunanbaevtyń ósıetteri qyrǵyz elin­de keń taraǵany aıtylǵan. Sondaı-aq TúrkSOI-dyń bas hatshysy Dúısen Qaseıinov te quttyqtaý lebizin bildirdi. TúrkSOI aıasynda ótkizilgen «Aqyn Abaıǵa myń taǵzym» atty konsertte Qazaq­stannan, О́zbekstannan, Túrkııadan, Túr­i­kmenstannan arnaıy kelgen jáne Qyr­ǵyzstannyń óner sheberleri Abaıdyń ánderi men shyǵarmalarynyń jelisi boıynsha kompozısııalardy kórer­menderge tartý jasady.

Nazarbek BAIJIGITOV,

Qyrǵyzstannyń jalpyulttyq «Qyrǵyz Týy» gazetiniń qyzmetkeri,

arnaıy «Egemen Qazaqstan» úshin

 Bishkek