«Qazaq onkologııa jáne radıologııa ǵylymı-zertteý ınstıtýty» AQ Basqarma tóraǵasy, QR DSM Bas onkology Dılıara Qaıdarova onkologııalyq pasıentterdi koronavırýsqa qarsy vaksınalaý boıynsha usynystaryn aıtty, dep habarlaıdy Egemen.kz.
Onkopasıentterde Covid-19 aýyr ótýi múmkin, olardyń koronavırýstan qaıtys bolý qaýpi joǵary. Sol sebepti olar úshin vaksına saldyrý mańyzdy.
«Kovıdten onkologııalyq naýqastardyń ólimi naýqastyń jaǵdaıyna, jasyna baılanysty 11-den 35% - ǵa deıin quraıdy. Naýqastyń jaǵdaıyna baılanysty onkologııalyq aýrýlary bar barlyq pasıentti vaksınalaý qajet. Immýnosýpressıvti naýqastarda ımmýnıtet qalyptasýy qıyn bolýy múmkin ekenin eskergen jón», dedi D.Qaıdarova.
Onyń aıtýynsha, sheshim qabyldarda qaýipter, pasıenttiń jasy, jalpy jaǵdaıy, qandaǵy leıkosıt pen neıtrofıldiń deńgeıi eskeriledi. Qazir vaksına eki ret salynatynyn eskere otyryp, onkolog emdeýdi bastaý nemese jalǵastyrý merzimine qaraı sheshim qabyldaýy kerek. Ásirese bul endi em bastaǵan naýqastarǵa qatysty. Mundaıda vaksınasııany tek mRNQ vaksınalarmen júrgizý kerek. Hırýrgııalyq emdeýge jiberiletin pasıentter operasııaǵa deıin nemese odan keıin vaksınalanady. Úlken isigi bar pasıentter mamandandyrylǵan em bastalǵanǵa deıin 2 apta buryn (múmkindiginshe) vaksınalanady. Sıtostatıkalyq em qabyldaıtyn pasıentter qajet bolǵan jaǵdaıda em aıaqtalǵannan keıin vaksına saldyrady.