Ishimdik iship alyp qyzmettik kólik júrgizgen Taldyqorǵan ákimdiginiń qurylys bóliminiń basshysy jumystan qýyldy. Sondaı-aq qala ákiminiń orynbasary Sáýle Arzanbekova «qatań sógis» aldy, dep habarlaıdy Egemen.kz QazAqparatqa silteme jasap.
Esterińizge sala keteıik, Taldyqorǵan qalalyq qurylys bóliminiń basshysy kósheniń qaq ortasynda áıelin uryp, vıdeoǵa túsip qalǵan bolatyn. Dál osy sheneýnik ishimdik ishken kúıinde qyzmettik kólik júrgizip, polıseılerge ustalǵan.
Sońynan belgili bolǵandaı, qalalyq ákimdiktiń birneshe qyzmetkeri bas qosyp, qoǵamdyq oryndardyń birinde otyrǵan. Otyrystaǵy áńgime arty daýǵa ulasady. 13 naýryz kúni túngi 24:00 – 01.00 shamasynda túsirilgen vıdeo boıynsha qyzmettik tekserý júrigizip, qorytyndysy jarııalandy.
«Taldyqorǵan qalasy ákiminiń orynbasary S.A.Arzanbekovaǵa ózine júktelgen fýnksıonaldyq mindetterdi tıisinshe oryndamaǵany úshin «qatań sógis» túrindegi tártiptik jaza qoldanyldy. «Taldyqorǵan qalasynyń qurylys bólimi» MM-niń basshysy M.A.Nurǵalıevti jumystan bosatyldy. «Taldyqorǵan qalasynyń kásipkerlik bólimi» MM-niń basshysy N.A. Qalıahmetovke ózine júktelgen fýnksıonaldyq mindetterdi tıisinshe oryndamaǵany úshin «qyzmetke tolyq sáıkes emestigi» túrindegi tártiptik jaza, «Taldyqorǵan qalasynyń ekonomıka jáne bıýdjettik josparlaý bólimi» MM-niń basshysynyń orynbasary A.S. Penge tártiptik jaza qoldanyldy», delingen Taldyqorǵan qalalyq ákiminiń baspasóz qyzmeti taratqan habarlamada.