Shyǵys Qazaqstanda qoqysty qaıta óńdep kádege jaratpaq. Sol maqsatta «О́KM Operatory» (О́ndirýshilerdiń keńeıtilgen mindettemeleri) JShS О́skemen men Semeı qalalarynyń ákimdikterine turmystyq qaldyqtardy jeke-jeke jınaýǵa arnalǵan 2856 konteıner men qoqys shyǵaratyn 12 birlik jańa tehnıkany tabys etti.
«О́KM Operatory» eki shaharǵa da zamanaýı qoqys suryptaý jelisin satyp alýdy qarjylandyryp otyr. Osy jobany júzege asyrýǵa barlyǵy 3,7 mlrd teńge qarajat bólingen.
Aımaqta qatty turmystyq qaldyqty bólek jınaý úsh fraksııa boıynsha júzege asyrylmaq. Iаǵnı qaldyq úshke bólinip tastalady. Máselen, «Jeńil» – qaıta óńdeletin qaıtalama shıkizat (plastık, qaǵaz, metall), «Aýyr» – buǵan shyny qaldyǵy jatady. Úshinshi «Dymqyl» – oǵan qaıta óńdeýge kelmeıtin qaldyqtar (tamaq qaldyqtary jáne taǵy basqalar) tastalady.
– О́KM Operatory Shyǵys Qazaqstannyń eki qalasy úshin 12 birlik arnaıy tehnıka satyp aldy. Onyń ishinde shyny konteınerlerine qyzmet kórsetýge arnalǵan kran-manıpýlıator qondyrǵysy ornatylǵan 4 qoqys tasyǵysh kóligi bar, – dedi «О́KM Operatory» JShS tóraǵasy Medet Qumarǵalıev.
Aıta keteıik, О́skemen men Semeı qalasynda turmystyq qaldyqty suryptap jınaý ınfraqurylymyn uıymdastyrý jónindegi jobanyń basty sharasy – aǵymdaǵy jyldyń qyrkúıek aıynda óndiristik qýaty jylyna 200 myń tonna turmystyq qaldyqty suryptaıtyn avtomatty jelini salý jáne iske qosý bolmaq.
Atalǵan keshendi jumys óńirdegi qaldyqtardy qaıta óńdeý kólemin ulǵaıtýǵa, turmystyq qaldyqty bólek jınaý ınfraqurylymyn damytýǵa, sondaı-aq jańa jumys oryndarynyń ashylýyna múmkindik beredi.