Qazaq tarıhynda óziniń parasattylyǵymen, batyrlyǵymen, aqyldylyǵymen erekshelengen tulǵalar az bolǵan joq. Eldiktiń eńsesin tiktep, Táýelsizdiktiń tuǵyryn bekitken, qazaq degen halqymyzdy tórtkúl dúnıege tanytqan Elbasy Nursultan Nazarbaev shyn máninde el baǵyna týǵan er ekenin sarabdal saıasaty arqyly san ret aıǵaqtady. Al 2019 jyldyń 19 naýryzynda ol ulty úshin qandaı kúrdeli sheshimge de bara alatyn, parasat-paıymy jeke múddeden bıik turatyn tulǵanyń ulyq úlgisin kórsetti.
Imperııalyq saıasattyń qol astynda bolǵan halyq rýhynyń myqtylyǵy, erjúrektiligi arqasynda úlken memleketke ıelik etip qaldy. El basqarý tájirıbesinde ótkenimiz ben búgingi kúnniń arasynda eljandylyq, otansúıgishtik sııaqty asyl qasıetterimiz urpaqtan-urpaqqa jalǵasyp keledi.
Qazaqstan táýelsizdik alǵan ýaqyttan beri elimizde kóptegen ózgeris boldy. Etek-jeńimizdi jıyp, el eńsesin tiktep, álemge máshhúr boldyq. Halyqaralyq bedelimiz nyǵaıa tústi. Desek te, el ishindegi ahýalǵa úlken qoldaý kerek. Halyqtyń áleýmettik jaǵdaıy jaqsaryp jatsa, jastardyń bilim alýyna mol múmkindik berilip jatsa, quba-qup. Osy turǵydan alǵanda Prezıdentimizden bastap, bılikte júrgen árbir azamattyń týǵan elimizge, halqymyzǵa Tuńǵysh Prezıdentimizdeı janashyr bolǵanyn qalar edim. Sapaly bilim men eldiń áleýmettik jaǵdaıynyń jaqsarǵany eldegi saıasattyń durys baǵdarda júrip jatqandyǵyn kórsetse kerek-ti.
Qaı halyqty alsaq ta onyń damýy mádenıeti men ádebıeti, óneri men biliminen kórinis beretini belgili. «О́ner súıgen patsha – halyq baılyǵy» deıdi. Al ulan-ǵaıyr dalamyzdaǵy baılyǵymyz – halyqtyń menshigi, nesibesi. Osynaý ıen baılyqty uqyptap, el ıgiligine jumsaıtyn basshydan biliktilik qana emes, parasattylyq ta talap etiledi. Qandaı deńgeıdegi basshy bolmasyn, halyqtyń únine qulaq asyp, etene jaqyn bolýy, muń-muqtajyn tyńdaýy aldaǵy atqarylar isterdiń nátıjeli bolýyna yqpal etpek. Al qazaq eliniń abyroıly bolǵany bılikte otyrǵan azamattarymyzdyń kóregendiligine baılanysty. Men elimdi bilimdi jastary bar, halqy dáýletti, meıirim men qaıyrymǵa toly isterimen erekshelenetin memleket retinde kórgim keledi.
Sábıt ORAZBAEV,
Qazaqstannyń halyq ártisi,
Memlekettik syılyqtyń laýreaty