Qaraǵaıly jańa yqsham aýdanyndaǵy dańǵylǵa Tuńǵysh Prezıdenttiń esimi beriledi, dep habarlaıdy Egemen.kz
Qazaqstannyń tuńǵysh prezıdenti Nursultan Nazarbaev Semeıdegi «Abaı arena» stadıonyn «Elbasy arena» dep ataýǵa qarsy bolǵany belgili. Endigi másele – Semeı qalalyq máslıhatynyń kezekten tys besinshi sessııasynda qaralǵan Qaraǵaıly jańa yqsham aýdanyndaǵy dańǵylǵa Tuńǵysh Prezıdenttiń esimin berý.
Dańǵyl Qaraǵaıly aýdanyndaǵy Semeı – Pavlodar tas jolynan bastaý alady. Sol jaǵynda kópsalaly mádenı-sport kesheni, Nazarbaev Zııatkerlik mektebi, al oń jaǵynda jańadan turǵyzylǵan turǵyn úıler men balabaqsha ornalasqan.
Qala basshylyǵynyń aıtýynsha, dańǵyldyń boıynda bolashaqta muz aıdyny keshenin, bilim jáne tehnologııalar transferi mektebin ashý josparda bar. Birneshe fýnksıonaldyq aımaqtar, serýendeý aımaqtary, qoǵamdyq tamaqtaný jerleri, balalarǵa arnalǵan oıyn jáne sport alańdary ashylýy múmkin. Kóshelerdi jaryqtandyrý, oryndyqtar, qoqys jáshikterin jáne shaǵyn sáýlet nysandaryn ornatý qarastyrylǵan.
Kezekten tys sessııada qarastyrylǵan barlyq másele boıynsha sheshimder biraýyzdan qabyldandy. Endi Qaraǵaıly kóshesine ataý berý týraly túpkilikti sheshimdi respýblıkalyq onomastıkalyq komıssııa qabyldaıdy.