Búgin Qoja Ahmet Iаsaýı kesenesine zııarat etip kelgen qonaqtarǵa kúlshe nan taratyldy, dep habarlaıdy Egemen.kz «Áziret Sultan» memlekettik tarıhı-mádenı qoryq-mýzeıiniń baspasóz qyzmetine silteme jasap.
Ulystyń Uly kúni Naýryz meıramy qarsańynda uıymdastyrylǵan sharanyń maqsaty - El Táýelsizdiginiń 30 jyldyǵyna oraı «Rýhanı jańǵyrý» baǵdarlamasy aıasynda tarıhı dástúrdi jańǵyrtý, kesene aýmaǵynda oryndalǵan ıgi is-áreketterdi nasıhattaý, tarıhı sanany qalyptastyrý.
-Iаsaýı kesenesinde kúlshe taratýdyń da ózindik dástúrli tarıhy bar. Buryn munda Ámir Temirdiń ýaqyftyq qolhaty boıynsha et pen bıdaıdy 24 saǵat boıy qaınatyp, pisiretin «Hálim botqa» tamaǵy daıyndalatyn bolǵan. Aptasyna eki ret ázirlenetin botqany aǵash astaýlarǵa salyp, qarılarǵa, dárýishterge, jarly-jaqybaılarǵa, múgedekterge, jınalǵan kópshilikke, jolaýshylarǵa úlestirgen. Kún saıyn ashanada pisirilgen kúlshe nandy alys joldan kelgen zııaratshylarǵa da taratatyn bolǵan. Búgin biz bul dástúrdi qaıta jańǵyrtyp Ulystyń Uly kúnine oraı uıymdastyryp otyrmyz,-dedi «Áziret Sultan» memlekettik tarıhı-mádenı qoryq-mýzeıiniń dırektory Nurbolat Ahmetjanov.
Tarıhqa kóz júgirtsek, ortaǵasyrlardan bastaý alǵan dástúr HH ǵasyrdyń basyna deıin jalǵasqan. Vakýfnama qujattarynda «....Qarılarǵa, jergilikti halyqqa arnaıy «Halım aba» as berilip turatyn bolsyn. Onyń ústine ár jyly, shamamen alǵanda un etip dıirmenge tartylǵan júz batpanǵa jýyq bıdaıdan kúlshe pisirilip taratylsyn» delingen.
Túrki jurtynyń tulǵasy Qoja Ahmet Iаsaýı men qazaqtyń handary jáne bıleri, batyrlary men ıgi jaqsylarynyń súıegi jatqan qasıetti jerge kelgen qonaqtar «Yrys pen berekeniń bastaýy – áz Naýryz» meıramynda taratylǵan nanǵa qýana qol sozyp, jaqsy yrymǵa balap, alǵystaryn jaýdyrdy.