Megapolıs ákimi Baqytjan Saǵyntaev «Almaty» telearnasynda Akimat Live baǵdarlamasynyń tikeleı efırinde karantındik sharalar epıdemııalyq ahýaldy jaqsartýǵa septigin tıgizetinin jetkizdi, dep habarlaıdy Egemen.kz.
Qala ákimi jergilikti turǵyndardyń suraqtaryna jaýap bere otyryp, 12 sáýirge deıin qabyldanǵan karantındik sharalar kásipkerlermen tyńǵylyqty talqylanyp jatqanyn jáne epıdemııalyq jaǵdaıdy jaqsartýǵa baǵyttalǵanyn atap ótti.
Baqytjan Saǵyntaev óz sózinde: «Eń bastysy jumysyna adal kásipkerler karantındik shekteýlerge túsinistik tanytýda. Eger qalamyzda koronavırýs órshı túsip, jaǵdaı baqylaýdan tys qalsa, tolyq lokdaýn oryn alýy ábden múmkin. Alaıda qazirgi tańda qalany tolyqtaı jabý kózdelmegen», deı otyra kásipkerler qaýymyn karantın rejımin buzbaýǵa jáne jappaı is-sharalar ótkizbeýge shaqyrdy.
Sondaı-aq, Almaty ákimi qoımalarda, dárihanalar men stasıonarlarda dárilik preparattardyń jetkilikti qory bar ekenin habarlady. Qurylǵan Turaqtandyrý qory sheńberinde farmasevtıkalyq kompanııalar 68 ataý boıynsha 48 mln-nan astam dárilik zattar men medısınalyq buıymdardy satyp alýdy júzege asyrdy. 28 mln-ǵa jýyq dári ataýlary Almaty qalasynyń dárihanalaryna jetkizildi jáne qoımalarda 20 mıllıonǵa jýyq preparattar bar, olardyń 8 mıllıony azaımaıtyn qaldyqty quraıdy. Osylaısha, qalada eki aılyq kovıdke qarsy preparattardyń qory quryldy.
Qalanyń aýdandyq ákimdikteri KVI emdeý hattamasyna kiretin 24 negizgi ataý boıynsha qalanyń 375 dárihanasynda dárilik zattardyń tabylýyna júıeli túrde monıtorıng júrgizýde.