Taraz qalasyndaǵy «Mamyr» toǵaıynda múmkindigi shekteýli jandarǵa arnalǵan «Asar» ońaltý-saýyqtyrý ortalyǵy jumys isteıdi. Memleket qoldaýynyń nátıjesinde, ótken jyly múgedektigi bar balalardy ońaltý jáne beıimdeý ortalyǵy jańa ǵımaratqa kóshirilgen bolatyn. Ol úshin oblystyq bıýdjetten 170 mln teńge qaralǵan. Al qosymsha bólingen 12 mln teńgege jıhaz jáne qajetti qural-jabdyqtar satyp alynǵan. Nátıjesinde atalǵan ortalyqtaǵy tárbıelenýshiler sany 40-tan 68-ge artqan.
О́tken jyldyń tamyz aıynda «Atletık» sport kesheniniń bazasynda ońaltý ortalyǵy iske qosyldy. Búgingi tańda munda koronavırýspen aýyrǵan naýqastar emdelýde. Degenmen de aldaǵy ýaqytta atalǵan ortalyq keńeıtilip, múgedektigi bar adamdardy ońaltýmen de aınalysady degen jospar bar. Máselen, «Aıqyn MSB» jaýapkershiligi shekteýli seriktestiginiń demeýshiligimen keshen qurylysyna 57 mln teńge jumsalǵan. Oǵan eshqandaı bıýdjet qarjysy shyǵyndalmaǵan. Biraq bul maqsatqa oblys ákimdiginiń tarapynan 0,9 gektar jer bólingen. Ortalyqtaǵy nysandardyń jalpy aýdany 900 sharshy metrden asady. Keshen múmkindigi shekteýli jandardyń qoǵamǵa beıimdelýine, olardy kásipke baýlyp, ózderiniń fızıkalyq múmkindikterine sáıkes tabys tabýǵa yqpal etýge baýlyp keledi. Ortalyqta bir mezette 60 adamǵa deıin oqyp, jumys isteı alady. Keshen negizgi jáne bıznes-ınkýbatordan, ıaǵnı sheberhanalardan turady. Onyń birinshisinde 30 bólme bolsa, bıznes-ınkýbatorda taǵy 8 bólme bar. Múgedektigi bar adamdar úshin jeti tigin, úsh tokarlyq, frezerlik jáne lazerlik stanoktar, sondaı-aq usaqtaǵysh qondyrǵylar ornatylǵan. Ortalyqta óz betinshe qozǵalyp nemese otyryp jumyspen aınalysa alatyn kelýshiler jumysqa ornalasý nemese óz jumysyn bastaý úshin jańa kásipterdi ıgeretin bolady. Barlyq bólme qajetti jıhazdarmen jabdyqtalǵan. Al sportpen shuǵyldanýǵa nıetti jandar úshin velotrenajer, tennıs ústeli jáne júgirý jolaqtary da qamtylǵan. «Ortalyq el Táýelsizdiginiń 30 jyldyǵyna oraı ashylyp otyr. Áleýmettik salada memlekettik qoldaýdyń jyl saıyn artyp kele jatqany belgili. Sońǵy jyldardaǵy qıyn jaǵdaılarǵa, álemdik ekonomıkalyq daǵdarysqa jáne koronavırýstyq pandemııaǵa qaramastan, birde-bir áleýmettik pakettiń qysqarýyna jol berilgen joq. Kerisinshe, qoldaý sharalary artty», deıdi «Asar» zańdy tulǵalar birlestiginiń tóraǵasy Rýslan Tólegenov.
Al Sıvara Nýrmatovanyń aıtýynsha, ınvataksı dıspetcherlik qyzmeti keńsesinde ótken jyldyń ózinde 17 myńnan astam kóliktik qyzmet kórsetilgen eken. Sonymen qatar «Múgedekterdiń jastar qoǵamy» qoǵamdyq birlestiginiń tóraǵasy Áıgerim Dáýletbaeva munda balalardy jalpy bilim beretin mektepte oqytýǵa daıyndaıtynyn, psıhologııalyq qyzmet, kúndizgi stasıonar palatalary, massaj, dárigerlik qabyldaý jáne em-dom, elektroforez kabınetteri jumys isteıtinin aıtty. Sondaı-aq bıznes-ınkýbatorda eresekter aǵash oıý, tigin, tokarlyq jumystarmen de aınalysa alady. Al búginde irgedegi 2,6 myń sharshy metr jerge ıppoterapııa ortalyǵynyń qurylysy bastalýda. Ortalyqtyń ashylý saltanatyna qatysqan kezde de Jambyl oblysynyń ákimi Berdibek Saparbaev óńirdiń ár aýdan ortalyǵy men qalalarynda múmkindigi shekteýli balalar men eresekterge arnalǵan ońaltý ortalyqtaryn ashý mindeti turǵanyn aıtqan edi. Endi mundaı mekeme bıyl Talas aýdanynyń ortalyǵy Qarataý qalasynda da ashylatyn bolady.
Jambyl oblysy