«Báıterek» ulttyq basqarýshy holdıngi agroónerkásip keshenin qarjylyq qoldaýmen aınalysa bastaıdy. «QazAgromen» qosylǵan soń holdıngtiń quzyreti osylaısha keńeıdi.
Osy jyldyń 15-naýryzynda Qarjy mınıstrliginiń Memlekettik múlik jáne jekeshelendirý komıteti tapsyrý aktisin bekitti. Sóıtip «QazAgronyń» úsh enshiles uıymy – «Agrarlyq nesıe korporasııasy» AQ, «QazAgroQarjy» AQ jáne «Aýyl sharýashylyǵyn qarjylaı qoldaý qory» AQ «Báıterek» holdınginiń quramyna ótti.
– Memleket basshysy Qasym-Jomart Toqaevtyń tapsyrmasy boıynsha aýqymdy jumys atqaryldy. Bul ońtaılandyrý damý ınstıtýttaryn neǵurlym tıimdi basqarýǵa jáne memlekettik qoldaýdy qazaqstandyqtarǵa sapaly, jedel jetkizýge arnalǵan. Qosylý prosesi fermerler úshin teris áser etpeıtinin erekshe atap ótkim keledi. Agroónerkásiptik keshenge memlekettik qoldaý tolyq kólemde kórsetiletin bolady, – dedi «Báıterek» holdınginiń basshysy Aıdar Áriphanov.
Budan bólek, «Báıterek» holdıngi agroónerkásiptik keshen sýbektilerin qarjylyq qoldaý sheńberinde Aýyl sharýashylyǵy mınıstrligimen, Qazaqstan qarjygerler qaýymdastyǵymen, ekinshi deńgeıli banktermen jáne damý ınstıtýttarymen birlesip jumys júrgizýde. Atap aıtqanda, agroónerkásiptik sektordaǵy áleýetti jobalar pýly ázirlendi. Ony iske asyrý ishki naryqty molyqtyrýǵa múmkindik beredi jáne asa mańyzdy taýar pozısııalary boıynsha ımportqa táýeldilikti azaıtady.
Osy oraıda, holdıngtiń uıymdyq qurylymynda shtat sanyn ulǵaıtpaı aýyl sharýashylyǵy aktıvterin basqarýdyń jańa departamenti qurylǵanyn atap ótken jón.
Eske sala keteıik, «Báıterek» holdıngi Memleket basshysynyń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýyn iske asyrý jónindegi Jalpyulttyq is-sharalar josparynyń 52-tarmaǵyn oryndaý maqsatynda ózine «QazAgro» holdıngin qosý arqyly biryńǵaı damý ınstıtýtyn qurý boıynsha is-sharalar ótkizýde.
Aıta ketý kerek, «QazAgroQarjy» AQ-ny «Agrarlyq nesıe korporasııasy» AQ-ǵa berý boıynsha Jol kartasy ázirleý satysynda. Bul tıisti zańnamalyq aktilerge ózgerister engizýdi, barlyq qajetti rásimderdi kózdeıtin bolady. Sonymen qatar lızıngtik mámilelerdi kepildendirý, mıkrobıznesti tikeleı kredıtteý jáne ósimdik sharýashylyǵyn saqtandyrý fýnksııalaryn keıinnen «Aýyl sharýashylyǵyn qarjylaı qoldaý qoryn» tarata otyryp, «Agrarlyq nesıe korporasııasyna» berý boıynsha jumys júrgizilýde.
Osylaısha, qazirgi ýaqytta «Báıterek» holdınginiń quramynda 12 enshiles uıym bar. Olar – «Qazaqstannyń damý banki» AQ, «Damý» kásipkerlikti damytý qory» AQ, KazakhExport eksporttyq saqtandyrý kompanııasy» AQ, «Qazyna Kapıtal Menedjment» AQ, «Qazaqstannyń ınvestısııalyq qory» AQ, QazTech Ventures AQ, Kazakhstan Project Preparation Fund JShS, «Qazaqstandyq turǵyn úı kompanııasy» AQ, «Otbasy bank» turǵyn úı qurylys jınaq banki» AQ, «Agrarlyq nesıe korporasııasy» AQ, «QazAgroQarjy» AQ, «Aýyl sharýashylyǵyn qarjylaı qoldaý qory» AQ. Sonymen qatar holdıngtiń portfeldi kompanııalaryn odan ári 12-den 7-ge deıin qysqartý jáne soǵan oraı shtattyń sanyn túzetý josparlanyp otyr.