Densaýlyq saqtaý mınıstri Alekseı Soı Almaty qalasyna issapary aıasynda qoǵamdyq monıtorıng tobynyń jetekshisi Saıda Taýkelovamen kezdesti. Júzdesýde Densaýlyq saqtaý mınıstrligi men «Qoǵamdyq baqylaý jáne monıtorıng» respýblıkalyq qoǵamdyq birlestigi arasynda yntymaqtastyq týraly memorandýmǵa qol qoıyldy.
Taraptar medısınalyq uıym, onyń ishinde Covid-19 indetine jáne pnevmonııaǵa qarsy kúreske tartylǵan stasıonarlyq emdeý mekemeleri, dárihanalar men dárihanalyq kóterme saýda qoımalary, sondaı-aq qaıyrymdylyq jáne gýmanıtarlyq kómekti bóletin uıymdar qyzmetiniń tıimdiligin, ashyqtyǵyn arttyrý jónindegi maqsattardy iske asyrýda ózara is-qımyl jasaýǵa nıetti. Budan basqa, halyqty sybaılas jemqorlyqqa qarsy is-qımyl prosesine tartý jáne azamattardyń memleket pen jergilikti basqarý organdarynyń qyzmetine senim arttyrý úshin qoǵamdyq múddelerdi qorǵaýǵa baǵyttalǵan azmattyq bastamalardy iske asyrý sheńberindegi yntymaqtastyq kózdelgen.
Densaýlyq saqtaý mınıstrligi men «Qoǵamdyq baqylaý jáne monıtorıng» RQB densaýlyq saqtaý salasynda uzaq merzimdi áriptestik baılanysty damytýǵa yqpal etetin jaǵdaı jasaýǵa, sondaı-aq ornyqty jáne úılesimdi damý qaǵıdattaryna sáıkes qoǵamdaǵy oń ózgeristerge baǵyttalǵan jobalardy qalyptastyrý jáne qoldaý boıynsha praktıkalyq qadamdardy júzege asyrýǵa kelisti. Atap aıtqanda, Qazaqstandaǵy oblystar men qalalarda gýmanıtarlyq jáne áleýmettik mańyzy bar jobalardy birlesip iske asyrý, qoǵamdyq monıtorıng salasynda baqylaý júrgizetin jumys toptaryn qurý josparlanǵan.
A.Soı atap ótkendeı, Densaýlyq saqtaý mınıstrligi medısınalyq kómektiń sapasyn jaqsartý jáne dári-dármekpen úzdiksiz qamtamasyz etý maqsatynda osy jumys formatyn qoldaıdy.