Keıingi jyldary qazaqstandyq tennısshilerdiń halyqaralyq arenalarda kórsetip júrgen tolaıym tabystarynyń arqasynda álemdik federasııalar bizdiń elmen, bizdiń sportshylarmen sanasa bastady. Memleket te tennıstiń damýyna, jasóspirimderdiń osy bir sportpen erkin aınalysýyna barynsha jaǵdaı jasap jatyr.
El qamqorlyǵyna ıe bolǵan otandyq tennısshiler osy bir 5-10 jyldyqta ATP men WTA sanatyna jatatyn birqatar jarysta boı kórsetip, álemniń úzdik tennısshilerimen ıyq tirestire óner kórsetýde. Tipti otandastarymyz keı jarystarda el mereıin asyryp, aıtýly týrnırlerde top jaryp júr. Atap aıtar bolsaq, 2015 jyly álemniń 31-raketkasy atanǵan Zarına Dıas búginge deıin bir márte WTA, segiz márte ITF sanatyndaǵy jarystarda bas júldeni oljalady. Al Qazaqstannyń birinshi raketkasy Elena Rybakına eki ret WTA, tórt ret ITF jarystarynda aldyna jan salmady. Sondaı-aq jerlesterimiz Devıs kýbogynda da táýir oıyn kórsetip júr. Erler quramasy 2011, 2013, 2014, 2015 jáne 2018 jyldary atalǵan týrnırdiń shırek fınalyna deıin jetse, 2019 jyly Ispanııanyń bas shahary – Madrıdte uıymdastyrylǵan jańa formattaǵy Devıs kýbogynyń fınaldyq kezeńinde oınady.
Mine, osyndaı nátıjelerden keıin Kásipqoı tennısshiler qaýymdastyǵy álemdik deńgeıdegi tennıs týrnırlerin Qazaqstanda da ótkizýge múmkindik berdi. Máselen, ótken jyldyń sońynda Nur-Sultanda Qazaqstan sport tarıhyndaǵy alǵashqy ATP 250 Astana Open týrnıri uıymdastyryldy. ATR 250 álemdik týry bir jylda 40 kásibı erler jarysyn ótkizedi. Alaıda ótken maýsymda pandemııaǵa baılanysty onyń tek 17-si ǵana ótti. Nur-Sultandaǵy týrnır is júzinde jyldyń sońǵy jarysy jáne tennısshilerge ATR reıtıngine jaǵdaıyn durystap alý úshin berilgen sońǵy múmkindik bolatyn.
Jýyrda elorda tórinde taǵy bir álemdik deńgeıdegi tennıs týrnıri uıymdastyryldy. El Táýelsizdigiń 30 jyldyǵyna oraı ótkizilgen ATP Challenger Tour serııasynyń Forte Challenger 100 jáne Forte Challenger 125 dodasy kóptiń kóńilinen shyqty. Bedeldi jarysqa álemdik reıtıngtiń úzdik júzdigine engen oıynshylar qatysty. Al Qazaqstan quramasynyń namysyn Mıhaıl Kýkýshkın, Dmıtrıı Popko, Aleksandr Nedovesov, Denıs Evseev, Tımofeı Skatov, Grıgorıı Lomakın jáne basqalar qorǵady.
«Qazaqstan astanasy iri jarystardy qabyldaı bastady. Búkil álemde koronavırýs pandemııasyna baılanysty kestedegi matchtardyń basym bóligi toqtatylǵandyqtan, Kásipqoı tennısshiler qaýymdastyǵy Qazaqstan tennıs federasııasynan birden eki týrnır ótkizýdi surady. Bul serııa Aýstralııa ashyq chempıonatynda óz ónerin aıaqtaǵan oıynshylar úshin birden eki úlken týrnırge daıyndalýǵa jáne qatysýǵa tamasha múmkindik. Qazaqstan quramasynyń barlyq ókili jarysqa qatysyp, upaı alýǵa, reıtıngtegi óz pozısııalaryn jaqsartýǵa berilgen múmkindikti jibermeý kerek. Eń aldymen bul – Olımpıada joldamasyn ıelený úshin de mańyzdy. Biz buǵan deıin «Chellendjer» sanatyndaǵy jarystar ótkizgen joqpyz, bul oıyndarda 100 jáne 125 upaı oınatylady. Joǵary deńgeıdegi týrnır bolǵandyqtan, eki jarysqa da myqty oıynshylar keldi. Sózimizge jarysqa tirkelgen sportshylardyń esimderi dálel bola alady», dep atap ótti Qazaqstan tennıs federasııasynyń vıse-prezıdenti Iýrıı Polskıı týrnırdiń ashylý saltanatynda.
Bir aptaǵa sozylǵan Forte Challenger 100 týrnıriniń jekeleı synynda amerıkalyq tennısshi Makkenzı Makdonaldtyń baǵy jandy. Týrnırde qarsylas shydatpaǵan Makdonald bas júlde úshin ótken kezdesýde aýstrııalyq Iýrıı Rodıonovtan esh qıyndyqsyz aılasyn asyryp ketti. Eki setke sozylǵan básekede ol 6:1, 6:2 esebimen basym tústi. Sonymen qatar Forte Challenger 100 jeńimpazy Makkenzı 100 reıtıngtik upaı men 14 400 AQSh dollaryn qanjyǵasyna baılady.
Marapattaý rásiminde sóz alǵan Makdonald Forte Challenger 100 uıymdastyrýshylaryna jarqyn ári qyzyqty týrnır úshin alǵysyn bildirdi. «Nur-Sultanǵa qaıta at basyn tirep, babym men baǵymdy synaý múmkindigin qýana qabyldadym. Byltyr qarasha aıynda Astana Open 2020 týrnırinde men shırek fınalǵa deıin jetip, qarsylasymnan jeńilip qaldym. Qazaqstan astanasyna jasaǵan ekinshi saparym sátti aıaqtaldy. Qonaqjaı elde ótkizgen árbir mınýtym erekshe ótti», dedi amerıkalyq tennısshi marapattaý rásiminde.
Al juptyq synda jerlesimiz Aleksandr Nedovesov ýkraınalyq Denıs Molchanovpen birge jup qurap, «Chellendjer» týrnıriniń jeńimpazy atandy. Osy jarystyń birinshi raketkasy retinde tirkelgen qazaqstandyq-ýkraınalyq jup fınalda amerıkalyq Natan Pasha men Maks Shnýrmen kezdesti. Birinshi partııada A.Nedovesov pen D.Molchanov 6:4 esebimen basym tússe, ekinshi sette de osy esep tirkeldi – 6:4.
О́kinishke qaraı, jekeleı synda óner kórsetken qazaqstandyqtardan Aleksandr Nedovesov irikteý jarysynan aryǵa asa almasa, Tımofeı Skatov, Mıhaıl Kýkýshkın týrnırdi birinshi aınalymda, Dmıtrıı Popko ¼ fınalda aqtady.
Al Forte Challenger 125 týrnırinde chehııalyq sportshy Tomash Mahachtyń baǵy jandy. Otandasy ári álemdik tennıs juldyzyna aınalǵan Tomash Berdyhpen attas jáne onyń sporttaǵy murageri dep tanylǵan Tomash Mahach fınalǵa deıin shveısarııalyq Henrı Laaksonendi, Forte Challenger 100 chempıony amerıkalyq Makkenzı Makdonaldty, ońtústikkoreıalyq Sýn-Vý Kvon men úndistandyq Pradjnesh Gýnnesvarandy jeńip, keremet oıyn órnegin kórsetti.
Fınaldyq matchta Tomash Mahach aýstrııalyq Sebastıan Ofnermen bas júldeni sarapqa saldy. Kópshilik kútkendeı fınaldyq kezdesý tartysqa toly boldy. Alǵashqy sette Ofner 6:4 esebimen óz paıdasyna jazsa, keıingi sette Mahach dál sondaı eseppen ese qaıtaryp, tarazy basyn teńestirip ketti. Sheshýshi kezeńde qarsylasyna qaraǵanda eptilik tanytqan cheh sportshysy úshinshi sette de 6:4 nátıjesimen jeńiske jetti. Qorytyndy esep – 4:6, 6:4, 6:4. Tomash Mahach – Forte Challenger 125 týrnıriniń chempıony!
– Kez kelgen fınalda jeńiske talas shıelenisti jaǵdaıda órbıdi. Qarsylasym óte jaqsy oınady, dopty oıynǵa qosýy da sátti shyqty. Biraq birinshi settegi qatelikterime kóńil kúıim túskenine qaramastan, men jeńiske jettim. Maǵan Qazaqstan unaıdy, bul – meniń tórtinshi saıahatym jáne qaıta jol túsip jatsa, qýana qabyl alamyn», dedi Mahach marapattaýdan keıin.
Forte Challenger 125 týrnır de qazaqstandyqtar úshin asa sátti bola qoıǵan joq. Baıraqty básekeniń tusaýkeser kezdesýinde kortqa shyqqan álemniń 96-shy, osy jarystyń 3-raketkasy Mıhaıl Kýkýshkın dúnıejúzilik reıtıngte 179-orynda turǵan portýgalııalyq Frederıko Ferreıra Sılvamen kezdesip, otandasymyz qarsylasyna eki sette (3:6, 5:7) ese jiberdi. Ol bir apta buryn da elordadaǵy osyndaı týrnırde alǵashqy aınalymnan asa almaǵan bolatyn. Taǵy bir qazaqstandyq tennısshi Denıs Evseev japonııalyq Tatsýma Itodan 4:6, 6:2, 3:6 esebimen utyldy.
Jekeleı synda qazaqstandyqtar arasyndaǵy eń úzdik nátıje Tımofeı Skatovqa tıesili boldy. Jarystyń 1/8 fınalyna deıin jetken ol shırek fınal úshin ótken básekede týrnır fınalısi – aýstrııalyq Sebastıan Ofnerge 6:3. 6:7 nátıjesimen jol berdi. Al juptyq synda Aleksandr Nedovesov pen serb Vıktor Troıskı juby jartylaı fınalda súrindi. Olar amerıkalyq jup Natan Pasha men Maks Shnýrmen kezdesip, eki sette (6:7 (5), 2:6) jeńilip qaldy.
Aıta keteıik, halyqaralyq týrnırdiń juptyq synynda amerıkalyq Natanıel Lemmons pen Djekson Ýıtroý juby jeńimpaz atandy.