Búginde respýblıkanyń ońtústik óńirlerinde shegirtke tektes zııankesterdi anyqtaý maqsatynda tekserý bastaldy. Bul týraly Egemen.kz QR AShM Agroónerkásiptik keshendegi memlekettik ınspeksııa komıtetine silteme jasap habarlaıdy
Bıyl shegirtke oshaqtaryn anyqtaý úshin GPS navıgatorlardy paıdalana otyryp, 524 birlik avtokólik pen 1230 tekserýshini jumyldyrý arqyly shamamen 38 mln gektar jerdi tekserý josparlanýda. Sondaı-aq shekaralas Reseı, Qytaı jáne О́zbekstan memlketterimen birlesken zertteýler júrgizý josparlanǵan.
Qazirgi ýaqytta elimizdiń ońtústik óńirlerinde tekserý jumystary bastaldy. Kóktemgi tekserý – qystap shyqqan shegirtkelerdiń jaı-kúıin anyqtaýǵa jáne hımııalyq óńdeý júrgizý úshin jaǵdaıdy boljaýǵa múmkindik beredi.
Aǵymdaǵy jyly respýblıka boıynsha shegirtke zııankesteriniń 640 myń gektar alqapta taralýy boljanýda. Shegirtkemen kúresýge respýblıkalyq bıýdjetten shamamen 2 mıllıard teńge qarastyrylǵan. Bul qarajatqa jetkilikti pestısıdter men hımııalyq óńdeý qyzmetteri satyp alyndy.
Sonymen qatar, ortalyq qoımada qosymsha pestısıdterdiń qajetti qory bar.
О́ńdeý jumystaryna183 birlik arnaıy tehnıka (150 birlik jer ústi búrikkishteri, 12 ushaq, 13 birlik asa jeńil áýekemeleri jáne 8 birlik aerozoldi gaz generatorlary) tartý josparlanýda.
О́ńirlerde hımııalyq óńdeý shegirtke zııankesteriniń taralý oshaqtary anyqtalýyna qaraı bastalatyn bolady. Bul úshin QR AShM Agroónerkásiptik keshendegi memlekettik ınspeksııa komıteti oblystyq ákimdiktermen birlesip monıtorıng jáne hımııalyq óńdeý jumystarynyń josparyn bekitti.