Alǵash ret memlekettik bilim grantyn utyp alýǵa nıettengen úmitkerler Ulttyq biryńǵaı testileýdi eki márte tapsyra alady. Máselen, eger talapker sáýir aıynda testileýden ótken bolsa, onyń UBT-ny ekinshi ret birneshe kúnnen keıin nemese mamyr ne maýsym aılarynda tapsyrý múmkindigi bolady. Testileýge bir kúnde 2 ret qatysýǵa tyıym salynady. Bul týraly Ortalyq kommýnkıasııalar qyzmetinde ótken brıfıngte BǴM joǵary jáne joǵary oqý ornynan keıingi bilim departamentiniń dırektory Ádilet Toıbaev habarlady, dep jazady Egemen.kz OKQ-ǵa silteme jasap.
«Memlekettik bilim berý grantyn alý konkýrsyna qatysý úshin oqýǵa túsýshi eń jaqsy nátıjesi bar sertıfıkatty usyna alady. Bul múmkindik úmitkerlerdiń grant utyp alý múmkindigin aıtarlyqtaı arttyra túspek. UBT-ny ádettegideı 3 mindetti jáne 2 beıindi pán boıynsha tapsyrady. Qatysýshylarǵa 120 test tapsyrmasy jáne 240 mınýt ýaqyt beriledi. UBT nátıjesi boıynsha talapkerler eń joǵary 140 ball jınaı alady», dedi spıker.
Qatysýshylar tapsyrmalardy kez-kelgen pánnen bastaı alady. Sondaı-aq testileý aıaqtalǵanǵa deıin jaýap berilgen suraqtarǵa qaıta oralyp, jaýaptardy túzetýge bolady. BǴM málimetinshe, talapkerlerge yńǵaıly bolý úshin UBT barysynda kompıýter ekranynda kalkýlıator, Mendeleev jáne tuzdardyń erigishtigi kesteleri usynylady. Test nátıjeleri birden belgili bolady jáne jarty saǵattyń ishinde apellıasııaǵa berý múmkindigi bar.