Sharapatqa shóldegen adamǵa demeý bolý, qamqorlyq kórsetý kez kelgen adamnyń qolynan kelýi ábden múmkin. Eń bastysy, kókirekte aq peıil, jan dúnıeńde janashyrlyq sezim bolsa bolǵany.
Ereımentaý aýdanynda halqymyzdyń san ǵasyr boıy sabaqtasyp kele jatqan ádemi salt-dástúriniń biri – qaıyrymdylyq qaǵıdattary sońǵy ýaqytta máni men mazmunyn aıǵaqtap, ómirsheńdigimen ónege bolyp, tipti tereńdeı túsýde. Ásirese jas tolqynnyń boıynda adamgershilik, parasattylyq, izgilik qasıetteriniń menmundalap turatyndyǵy kóńil demeıdi. Aýdandaǵy eriktiler qoǵamnyń kóptegen salasyn tolaıym qamtyp otyr. Olar muqtaj adamdarǵa, áleýmettik-turmystyq jaǵynan az qamtylǵandarǵa qolushyn sozýda. Sondaı-aq el ishindegi ózekti máseleler de nazardan tys qalmaǵan. Adamǵa ǵana emes, tabıǵatqa da janashyrlyq jasap jatqandyǵyn kórip, el erteńin oılaǵan jas býynnyń kóńil kókjıegine tánti bolatynyń bar.
Bári qalaı bastalyp edi? Ádette ushqyn jalynǵa ulasady. El bolyp eńse kótergen Volonter jyly sheńberinde aýdannyń árbir selolyq okrýginde eriktiler ortalyǵy quryldy. Jan dúnıesiniń qalaýymen jaqsy iske jumylǵan jastar júzdep sanalady. Qulaqqaǵys retinde qazvolunter.kz saıtynda tirkelgen eriktilerdiń janashyrlyq qyzmet aıasy ýaqyt ótken saıyn keńeıe túsýde.
Qysy qatal, qary mol óńirdegi jastar syn saǵatta qoly qysqa adamdardy qamqorlyqtaryna aldy. Olar jalǵyzilikti jandardyń aýlalaryn qardan tazalap, azyq-túlikterin ýaqtyly jetkizip berip otyrsa, kóktem týǵaly sý tasqyny bolýy múmkin aımaqtarda bir jaǵadan bas, bir jeńnen qol shyǵaryp jumys istep júr. Sózimiz dáleldi bolýy úshin eriktilerdiń 70-ten astam zeınetkerge, 20-ǵa jýyq kópbalaly otbasyna, on shaqty jalǵyzbasty anaǵa naqty qamqorlyq kórsetkenin erekshe aıta ketýge bolady.
Jaqsy isi úlgi, ómirsheń ónege bolyp sabaqtalǵan, el ishinen ekshelgen eriktiler jyl basynan beri uzyn-yrǵasy myńnan astam adamdy qamtıtyn otyzǵa jýyq irili-usaqty shara ótkizdi. Barlyq sharanyń maqsaty bir arnada toǵysyp jatyr. Ol eń aldymen týǵan jerdiń tósinde áldebir jaǵdaımen eshkimniń kemdik kórip, qatardan qalmaýy. Jan júrekteri jabyrqap, jalǵyzsyramaýy. Birlese atqarǵan kóp jumys birliktiń týyn bıiktetti, jalyndy jastardy jalpaq elge súıikti etti. Ásirese «Biz birgemiz», «Súıikti isińmen aınalys» tárizdi aksııalardyń sharapaty kóp boldy. Jastar 8 naýryz kúni óńirdegi dárigerlerdi quttyqtap, erlikpen para-par eńbekterine laıyqty qurmet kórsetti.
Selolyq okrýgterdegi aýyl jastary «Qamqorshylar» baǵdarlamasyna belsene atsalysty. Qıyndyqtan qaımyǵa qoımaıtyn jas tolqyn kópbalaly jáne áleýmettik jaǵynan az qamtylǵan otbasylaryna jaman tumaýdyń jolyn kesetin dári-dármektermen qamtamasyz etti. Qarǵa adym jer muń bolyp qalǵan shaqta qarııalardyń as-sýyna da qaraılasty. «Qyzyl Jarty Aı» qoǵamymen birlese, jergilikti jomart jandardyń kómegimen jetpisten astam otbasyna azyq-túlik, sharýashylyq taýarlary tárizdi qajettilikterin jetkizip berdi. Volonterler dert órship ketken tusta áleýmettik nysandardy zararsyzdandyrýǵa qatysty. Emdeý mekemelerimen birlese otyryp, qorǵanys sharalaryn qalaı júrgizý kerektigi týraly beınebaıandar túsirip, áleýmettik jeli arqyly kórermender nazaryna usyndy. Karantın kezinde 15 erikti emhana dárigerlerine qolǵanat boldy. Olar esepte turǵan, sozylmaly syrqaty bar adamdarǵa qajetti dári-dármekterin aparyp, alǵystaryn arqalady.
Áleýmettik jeli arqyly el eńsesin kóterý úshin ınabatty, ımandy sharýalardy nasıhattaýǵa da tize qosyp kiristi. Osynaý sharalardyń nátıjesi el ishinde jeldeı esip, halyqtyń rýhyn kóterip, tez tarap otyrdy. Onyń da jaqsy jaǵy bar. Aýyl-aımaqtyń birlesýine, aýyzbirshiliktiń artýyna yqpaly tımek.
Sátimen sabaqtalǵan is Birjansal aýdanynda da óristeýde. Aýdandaǵy toqsanǵa jýyq volonter ortaq maqsat jolynda eńbek etýde. Olar ózge óńirlerdegi tárizdi qoǵamnyń osal býynyn esepke alyp, qamqorlyq kórsetýde. Kópbalaly jáne áleýmettik jaǵynan az qamtylǵan otbasylarǵa qajetti kıim-keshek jınastyrdy. Demeýshilerdiń kómegimen azyq-túlik sebetterin taratty. Ásirese aqparattyq-túsindirý jumystary tııanaqty júrgizilýde. Dert tyrnaǵyna ilinbeý úshin qalaı qorǵaný kerektigi táptishtep túsindirilgen únparaqtar taratyp, el ishinde túsindirý jumystaryn uıymdastyrdy. Táýelsizdiktiń 30 jyldyǵy qarsańynda «Qaıyrymdy ister sapary» aksııasynyń sheńberinde «Semizbaı-U» jaýapkershiligi shekteýli seriktestigi jalpy quny 300 myń teńge turatyn azyq-túlik sebetin otyzdan astam otbasyna jetkizip berdi. «Biz birgemiz!» aksııasy aıasynda 1 800 000 teńgeniń kómegi kórsetildi. Aýdandyq provızorlyq ortalyqqa eki ottegi konsentraty, 45 kombınezon jáne medısınalyq halattar men tósek jabdyqtaryn alyp berdi. Bul iske 2 700 000 teńge qarajat jumsaldy.
Respýblıkalyq «Myń alǵys» aksııasyn belsendi qoldaǵan jastar Uly Otan soǵysy ardagerleriniń otbasylary men tyl ardagerlerine 400 myń teńgeniń kómegin kórsetse, Kaz Beef jaýapkershiligi shekteýli seriktestigi izgilikti iske 2 730 000 teńge baǵyttady.
Imandy sharýadan din ókilderi de syrt qalǵan joq. Aýdandaǵy Áshim ata meshitiniń ujymy respýblıkalyq «Myń alǵys» aksııasyna qoldaý kórsetip, kópbalaly jáne áleýmettik jaǵynan az qamtylǵan otbasylarǵa 300 myń teńgeniń járdemin berdi. Balalardy qorǵaý kúnine oraı «Semizbaı-U» seriktestigi 615 myń teńge kóleminde janashyrlyq jasasa, astana kúnine oraı 400 myń teńgege muqtaj adamdarǵa qamqorlyq jasady.
О́ńirdiń óńin adamgershilikke negizdelgen janashyrlyq ister jaqsarta túsýde. Darqan dala tósindegi san ǵasyr boıy sabaqtasyp kele jatqan jomarttyqtyń tini osylaısha birikken birlikke, uıyǵan uıymshyldyqqa ulasyp, izgilik otyn laýlatyp jalǵasyp kele jatqany qandaı jarasymdy.
Aqmola oblysy