Jyl saıyn elimizde sıfrlandyrý salasy boıynsha birqatar irgeli bastama qolǵa alynady. Maqsat – halyqtyń sıfrly saýattylyǵyn arttyrý jáne prosesterdi meılinshe jeńildetý. Sıfrly damý, ınnovasııalar jáne aeroǵarysh ónerkásibi mınıstrligi sıfrly qujattar servısin damytýdy josparlap otyr.
Vedomstvo basshysy Baǵdat Mýsınniń aıtýynsha, budan bylaı Qazaqstanda úsh bank qarjylyq qyzmetterdi usyný kezinde klıentterden jeke kýálikti talap etpeıdi.
– Sıfrly qujattar servısi qashan iske qosylady dep bári suraıdy. Biz ony zańnamalyq turǵyda bekitip, tehnıkalyq jaǵynan júzege asyryp qoıdyq. Endi tek tehnıkalyq ıntegrasııany jetildire túsý ǵana qaldy. Qazirdiń ózinde úsh bank klıentten qujat suramaýǵa daıyn. Olar bul jaıynda ózderiniń pıar-strategııasyn usyný kezinde jarııalaıdy, – deıdi mınıstr.
B.Mýsınniń sózinshe, qazir qujattardyń sıfrly servısinde 13 qujat bar. Servıs qaǵaz qujattardy usyný qajettigin toqtatady. Qazirgi ýaqytta atalǵan servıste 9 qujat usynylǵan: Qazaqstan azamatynyń jeke kýáligi, nekeni tirkeý jáne buzý týraly kýálik, týý týraly jáne aty-jónin aýystyrý týraly kýálik, júrgizýshi kýáligi, bilimi týraly dıplom, stýdent bıleti jáne PTR-test nátıjesi.
«Aqparattandyrý týraly» zańǵa elektrondy qujattardyń qaǵaz qujattarmen teń dárejede qoldanylatyny týraly norma engizilgendikten, bul qujattar legıtımdi bolyp sanalady.
Sonymen qatar elektrondy jeke kýálikti Nur-Sultan men Almaty qalalary arasyndaǵy áýe sapary kezinde de qoldanýǵa bolady. «Eır Astana» áýe kompanııasynyń turaqty reısterimen ushatyn jolaýshylar áýejaıda eGov Mobile qosymshasy arqyly elektrondy jeke kýálikti kórsetýge quqyly. Sıfrly qujattar servısin paıdalanýshy azamattar reıske tirkelý kezinde, ushar aldyndaǵy tekserýden óter kezde qosymsha arqyly jasalatyn QR-kodty kórsetýge mindetti. Aldaǵy ýaqytta sıfrly qujattar servısi elimizdegi barlyq áýejaıda engizilmek. Ázirge joba qanatqaqty rejimde júzege asyp jatqandyqtan jolaýshylar ózimen birge jeke kýáligin de alyp júrgeni abzal.
«Sıfrly qujattar» – eGov Mobile mobıldi qosymshasynda jeke elektrondy qujattardy saqtaıtyn servıs. Sondaı-aq bul qyzmet azamatqa onyń kelisimi boıynsha úshinshi tulǵalarǵa qujattarǵa qol jetkizýge múmkindik beredi. Ol úshin «Sıfrly qujattarǵa» kirip, qajetti qujatty ashyp, «Qoljetimdilikti ashý» batyrmasyn basý jetkilikti. Osydan soń úshinshi taraptyń bir rettik skanerleýi úshin biregeı QR-kod jasalady.