Elorda mańyndaǵy Selınograd aýdanynyń Qoıandy aýylynda Aqmola oblysy men Nur-Sultan qalasynyń qutqarýshylary úsh turǵyn úıden erigen qar sýyn sorý boıynsha apattyq-qutqarý jumystaryn júrgizýde. Onda qardyń tez erýi jáne erigen sýdyń jınalýy saldarynan úıler men aýla aýmaqtaryn sý basty.
TJM resmı ókili Talǵat Ýálıdiń aıtýynsha, avarııalyq-qutqarý jumystaryn júrgizýge TJD men jergilikti atqarýshy organdardyń kúshteri men quraldary jumyldyryldy. Atap aıtqanda, 49 adam, 17 birlik tehnıka, 9 birlik motopompa apat saldaryn joıýǵa tartyldy.
Sonymen qatar Selınograd aýdanynyń Talapker, Qaraótkel, Qoıandy, Araıly, Qarajar, Qyzyljar, Aqmol, Qosshy, Qabanbaı batyr, Qyzylsýat jáne Jarlykól kentterinde erigen qar sýyn sorý jumystary júrgizilýde.
Keshe saǵat 10.35-te Nur-Sultan qalasynan «Qazavıaqutqarý» AQ MI-869 tikushaǵy sý tasqyny jaǵdaıyna monıtorıng júrgizý úshin áýege kóterildi. Baǵyty Vıacheslav sý qoımasy – Qoıandy – Ilınka – Preobrajenskıı sý rettegishi. Tikushaqta Aqmola oblysy ákimdigi, tótenshe jaǵdaılar departamenti, Ekologııa, geologııa jáne tabıǵı resýrstar mınıstrligi jáne «Qazgıdromet» RMK ókilderi boldy. Jaǵdaı Aqmola oblysy TJD bastyǵy Nurlan Atyǵaev pen jergilikti atqarýshy organdardyń baqylaýynda.
Aıta ketý kerek, Aqmola oblysynda qardyń erýi saldarynan sý basýǵa jol bermeý úshin eldi mekenderde qar shyǵarý jumystary júrgizilýde. Jalpy, oblys boıynsha 447 813,76 tekshe metr qar shyǵaryldy. 177 921,8 tekshe metr erigen qar sýy soryldy. 13 482 qapqa ınertti materıaldar salynyp, tóseldi. 2 511 metr bóget nyǵaıtyldy. 128 084,61 metr sý burý arnalary men aryqtary tazartyldy. 2 099 metr arnalar men aryqtar qalpyna keltirildi.