Respýblıkalyq deńgeıde medısınalyq avıasııa nysanyndaǵy medısınalyq kómek 2011 jyldyń sáýir aıynan bastap elimizdiń turǵyndaryna kórsetile bastady, dep habarlaıdy Egemen.kz
Shuǵyl kómektiń bul túrin medısınalyq avıasııa mobıldik brıgadasynyń joǵary bilikti mamandary kórsetedi. Medısınalyq avıasııa qyzmetkerleri — batyr adamdar, olardyń kúndelikti eńbegi — jasyna, jynysyna, áleýmettik mártebesine jáne ornalasqan jerine qaramastan, shuǵyl medısınalyq kómekke muqtaj adamdardyń ómirin qutqarý. Olar kún saıyn medısınalyq kómek kórsetý jáne pasıentterdi oblystyq nemese respýblıkalyq aýrýhanalarǵa tasymaldaýdy júzege asyrý úshin otanymyzdyń shalǵaı jáne qol jetimdi emes aımaqtaryna ushady.
Búgin biz sizderdi Ulttyq shuǵyl medısınany úılestirý ortalyǵynyń medısınalyq avıasııa mobıldik brıgadasynyń feldsheri Baqyt Jumabaevpen tanystyrǵymyz keledi.
– Baqyt, qaıyrly kún, feldsher mamandyǵyn tańdaýyńyzǵa ne sebep boldy?
– Cálemetsiz be. Bizdiń otbasymyz úlken dárigerler áýleti, men kishkentaı kezimnen basqa mamandyqtyń adamy bola alamyn dep oılaǵan joqpyn. Meniń medısınalyq bilimim — Arqalyq medısınalyq ýchılıshesinen bastaldy, oqýdan keıin jedel járdem brıgadasynda jumys isteý armany paıda boldy. Medısınada salasyndaǵy 21 jyldyń shamamen 6 jyly osy medısınalyq avıasııada jalǵasýda.
– Alǵashqy jumys kúnińiz esińizde me?
– Árıne. Eńbek jolymdy Arqalyq qalasynyń jedel járdem stansııasynan bastadym. О́zimniń qan qysymy joǵary ájege barǵan alǵashqy shaqyrtýym esimde jaqsy saqtalyp qaldy. Biz kelip, qajetti kómekti kórsettik, alaıda ustama toqtamady jáne ájeni aýrýhanaǵa aparýǵa týra keldi. Onyń kózderi áli esimde. Ol bizge kórsetken qamqorlyǵymyz úshin shyn júrekten alǵysyn aıtyp, batasyn berdi. Bul ómir boıy este qalady.
– Medısınalyq avıasııa feldsheriniń mamandyǵy óte mańyzdy, jaýapty ekeni sózsiz. Sizdiń jumysyńyzda eń qıyn ne nárse?
– Bizdiń barlyq pasıentterimiz negizinen reanımasııalyq pasıentter. Aýyr haldegi pasıentti bortqa alar kezde, aspanda siz onyń aýrýymen jalǵyz qalasyz, keıde bort aýaǵa kóterilgennen keıin pasıenttiń jaı-kúıi qandaı bolatynyn boljaý qıyn. Munda pasıentti joǵaltpaý úshin bireýge qońyraý shalýǵa, konsýltasııa alýǵa múmkindik joq, sheshimdi dereý qabyldaý qajet. Bizdiń mindetimiz – dárigermen birlese jumys isteý jáne bir komanda bolý. Biz pasıentke qajetti kómekti jedel kórsetýge árqashan daıyn bolýymyz kerek jáne bizdiń jumysymyzda tek arnaıy daıyndyqtyń ózi jetkiliksiz. Kásibı tájirıbe, kezek kúttirmeıtin terapııa, hırýrgııa, pedıatrııa, akýsherııa, gınekologııa jáne basqa da medısınanyń ártúrli salalarynda keń aýqymdy bilim, sonymen qatar belgili bir moraldyq qasıetter qajet. Meniń oıymsha, siz unatatyn mamandyqta qıyndyqtar bolmaıdy. Sizge tek óz isińizdi jaqsy kórýińiz kerek.
– Al, bul salada sizdi ne qyzyqtyrady?
– Kóp nárse. Meniń jumys kúnim eshqashan qaıtalanbaıdy. Ár kún - bul jańa adamdar, jańa baǵyttar, minezdi, bilimdi synaý, adammen sóılese bilý. Bizdiń isimizde kezdeısoq adamdar joq. Eń bastysy, adam ómirin qutqarǵan kezde qanaǵattanyp, keremet kóńil-kúıde bolasyń. – Mundaı psıhologııalyq aýyrtpalyqqa qalaı tótep beresiz?
– Eger biz óz emosııalarymyzdy ustaı almasaq, biz óz jumysymyzdy oryndaı almaımyz. Bul jyldar boıy, tájirıbemen keledi. Qalaı bolǵanda da, pasıent úshin alańdaý bolady, biraq ony kórsetý kásibılik emes. Ustamdy bolý qajet, psıhologııany oqý, ózińmen, ózińniń emosııalaryńmen jumys jasaı bilý qajet.
– Jumys kúnińiz qalaı ótetinin aıtyńyzshy. Bir aýysymda qansha ushý oryndaısyzdar?
– Aýysymǵa aýyspas buryn biz qysymdy, temperatýrany ólsheý, jalpy jaı-kúıdi baǵalaý sııaqty mindetti medısınalyq qarap-tekserýden ótemiz. Adamdarǵa kómektesý úshin men eń aldymen fızıkalyq jáne psıhologııalyq turǵydan jaqsy bolýym kerek. Brıgadanyń jumysy jabdyqtyń jaramdylyǵyn tekserýden bastalady. Sondaı-aq dárilerdiń qajetti kóleminiń bolýy da tekseriledi.Osydan keıin biz «kútý rejıminde» bolamyz: medısınalyq kómek kún men túnniń kez kelgen ýaqytynda qajet bolýy múmkin – biz árqashan ázirlik ústindemiz. Táýlik ishinde brıgada 1-den 3-ke deıin ushyp shyǵýdy júzege asyrady.
– Pandemııa barlyq qyzmet salalaryna ózindik túzetýler engizdi jáne eń aldymen medısınaǵa áser etti. Sizderde atap aıtqanda ne ózgerdi?
– Koronavırýstyq pandemııa barlyǵymyz úshin eń úlken synaq boldy. Pasıentke ushqan kezde: jeke qorǵanys quraldarynda jumys isteý qajettigi sııaqty belgili bir túzetýler engizildi. Pasıentterge medısınalyq kómek kórsetý kezinde basqalar úshin ınfeksııa kózi bolmaý óte mańyzdy. Pasıentti tasymaldaǵannan keıin mindetti túrde áýe kemesiniń salonyna dezınfeksııa júrgiziledi.Koronavırýstyq ınfeksııamen kúreste kóptegen elder, onyń ishinde bizdiń elderimiz de, kóptegen jaqsy, kásibı medısınalyq mamandardan aıyrylǵany óte ókinishti.
– О́mirińizdi medısınamen baılanystyrǵanyńyzǵa ókinbeısiz be?
– Joq, bul meniń ómirimniń ajyramas bóligi. Men jumys isteýge daıynmyn, adamdarǵa kómektesý maǵan unaıdy. Meniń jumysymnyń arqasynda men óz isimniń kásibı mamandarymen – jaǵdaıy aýyr pasıentterge birge ushatyn áriptesterim medısınalyq konsýltanttarmen, operasııalardy oryndaıtyn dárigerlermen tanystym. Men olardan kóp nárseni úırenemin. Qazir medısına qyzmetkerleriniń kópshiliginiń daıyndyq deńgeıi joǵary, biz óz daǵdylarymyzdy únemi jetildirip otyramyz, ozyq ádisterge úırenemiz, medısınalyq manıpýlıasııalar tehnıkasyn pysyqtaımyz.
– Bıylǵy jyl mańyzdy, erekshe kúnderge toly. Qazaqstan Respýblıkasy Táýelsizdiginiń 30 jyldyǵy men medısınalyq avıasııa qyzmetiniń 10 jyldyǵy qarsańynda adamdarǵa qandaı tilek aıtar edińizi?
– Adamdar aýyrmasyn, pandemııa aıaqtalsyn dep tileımin. Halqymyzdyń densaýlyǵyn saqtaý maqsatynda birlesip jasalǵan jumys úshin taǵdyryma jáne áriptesterime alǵys aıtamyn jáne medısınalyq avıasııa salasynyń damýyna tilektespin.
– Baqyt, suhbat bergenińiz úshin sizge de alǵys aıtamyz.
Medısına qyzmetkeri mamandyǵy alǵys pen joǵary gýmanızmmen erekshelenedi. Sizdiń kásibıligińiz, janqııarlyǵyńyz ben meıirimdiligińiz densaýlyqty qalpyna keltirip qana qoımaı, kóptegen adamdardyń ómirin saqtap qalýǵa múmkindik beredi. Zor eńbegińiz úshin rahmet! Shydamdylyq, jaqsylyq jáne myqty densaýlyq!