Nur-Sultanda kóktemgi tazalyq jumysy dástúrli túrde jalǵasýda. Aýqymdy jumystarǵa 1900 kommýnaldyq qyzmetker men 650 arnaıy tehnıka jumyldyryldy. Qalany sanıtarlyq tazalaý jáne abattandyrý kún saıyn, sol sııaqty túngi aýysymda da júrgiziledi, dep habarlaıdy Egemen.kz elorda ákimdiginiń resmı saıtyna silteme jasap.
Qalanyń kommýnaldyq qyzmetteri kún saıyn joldardy, trotýarlardy, kópirlerdi, qorshaýlardy, jol belgilerin, bılbordtardy jáne t.b. jýady. «Elorda ákimi Altaı Kólginovtiń tapsyrmasy boıynsha qalada sanıtarlyq tazalaý jumystary kúsheıtildi, sondaı-aq, mobıldi toptar qurylys ýchaskelerinde de aralaý jumystaryn júrgizýde. Sebebi qurylys nysandarynda abattandyrý erejelerin buzý faktileri bar. Bul aýmaqta arnaıy tehnıka dóńgelekterin jýý pýnkteriniń ashylmaǵany, alańishilik ótpe joldardyń qatty tósemesi qoıylmaǵany sekildi buzýshylyqtar bar. Qurylys jumystary eskertýler joıylǵanǵa deıin toqtatyldy», dedi elorda ákiminiń orynbasary Nurlan Soltambekov. Sonymen qatar, ol qalada jol shuńqyrlaryn jóndeý jumystary júrgizilip jatqanyn, jaqyn arada kóshelerdi ortasha jáne kúrdeli jóndeý bastalatynyn atap ótti. Qalanyń eski bóligine, júrip ótý múmkindigi joǵary turǵyn úı massıvterine jáne t.b. tustarǵa nazar aýdarylatyn bolady. Buǵan deıin elorda ákimi Altaı Kólginov sapasyz jol jumystary qabyldanbaıtynyn, óz jumysyn sapasyz oryndaıtyn merdigerlerdiń isi sotqa berilip, «qara tizimge» engiziletinin atap ótti. Esterińizge sala keteıik, ótken jyly Nur-Sultanda 170-ten astam kóshe jóndeldi, onyń 100-i — turǵyn úı alaptarynda.