Elektrondyq sıfrlyq qoltańba óz qolymen qoıylǵan qoltańbaǵa teń jáne zańdyq saldary da birdeı bolady. Bizge jeke jáne laýazymdy tulǵalardyń olarǵa tıesili ESQ-ny úshinshi tulǵalarǵa zańsyz berý faktileri boıynsha materıaldar men shaǵymdar kóptep kelip túsedi. Edáýir jıi kezdesetin jaǵdaılar – uıymdardyń, onyń ishinde memlekettik organdardyń basshylarynyń ózderiniń ESQ-syn qaraýsyz qaldyrýy, jumystan bosatylǵan qyzmetkerlerdiń ESQ-syn keri qaıtarmaýy, ózderiniń ESQ-syn basqa qyzmetkerlerge berýi. OKQ ótken brıfıngte QR SDIAО́M aqparattyq qaýipsizdik komıtetiniń tóraǵasy Rýslan Ábdiqalyqov «qoltańbanyń» elektrondy nusqasynyń mán-mańyzyn eskermeýdiń nemese baǵalamaýdyń saldarynan mysaldar keltirip ótti.
Zańsyz berilgen ESQ kómegimen senimhattar resimdelip, qarjylyq qujattarǵa qol qoıylǵan jaǵdaılar boldy.
«ESQ-ny berý faktileri boıynsha biz QR ÁQBtK-niń 640-baby boıynsha ákimshilik ister qozǵaımyz jáne 15-ten 50 AEK-ke deıingi mólsherde qarjy óndirip alynady. 2020 jyly ESQ-ny zańsyz berýdiń jáne elektrondyq qoltańbany tıisinshe qorǵaýdyń 30-dan astam faktisi anyqtaldy, 2021 jyldyń basynan beri 6 is qaraldy, óndiriste taǵy 3 is bar», dep atap ótti Ábdihalyqov.
Ol qazaqstandyqtardy eshbir jaǵdaıda ESQ-ny basqa tulǵalarǵa bermeýge, qaraýsyz qaldyrmaýǵa, sondaı-aq kiltti berýdi talap etýge eshkimniń quqyǵy joq ekenin esten shyǵarmaýǵa shaqyrdy.