Dýshanbe qalasynda TMD-ǵa múshe memleketterdiń Qorǵanys mınıstrleri keńesi janyndaǵy áýe shabýylyna qarsy qorǵanys máseleleri jónindegi úılestirý komıtetiniń otyrysy jáne Dostastyq elderi qarýly kúshteriniń áýe shabýylyna qarsy qorǵanys áskerleriniń qolbasshylarymen oqý-ádistemelik jıyn ótti, dep habarlaıdy Egemen.kz Qorǵanys mınıstrliginiń baspasóz qyzmetine silteme jasap.
Otyrysta 2021 jyly TMD-ǵa múshe memleketteri áýe shabýylyna qarsy qorǵanys birlesken júıesiniń jedel jáne jaýyngerlik daıarlyqtyń birikken is-sharalaryn ótkizý týraly usynystar talqylandy.
Qazaqstan Áýe qorǵanysy kúshteriniń bas qolbasshysy avıasııa general-leıtenanty Nurlan Ormanbetov áýe shabýylyna qarsy qorǵanys áskerleriniń «Jaýyngerlik baýyrlastyq – 2021» birlesken oqý-jattyǵýyn ótkizý mánisi boıynsha baıandama oqydy.
«Jaýyngerlik baýyrlastyq» oqý-jattyǵýy eki jylda bir ret TMD ÁShQQ birikken júıesindegi jaýyngerlik ázirlik deńgeıin arttyrý maqsatynda ótkiziledi.
Oqý-ádistemelik jıyn barysynda RF Áskerı-ǵaryshtyq qorǵanys áskerı akademııasy men RF ÁǴK Ortalyq ǵylymı-zertteý ınstıtýtynyń bastyqtary Dostastyq elderi qarýly kúshteriniń áýe shabýylyna qarsy qorǵanys áskerleriniń qolbasshylary talqylaǵan áýe shabýylyna qarsy qorǵanys júıesin qurý salasyndaǵy zertteýlerdi usyndy.