Bank aktıvteri kóbeıdi

Ranking.kz aqparatyna súıensek, naýryz aıyndaǵy kór­setkish (32 trln teńge) aqpan aıy­men salystyrǵanda 2,2 pa­ıyz­ǵa, al bir jyl burynǵy ýaqyt­pen salystyrǵanda 19,7 paıyzǵa jo­ǵary. Aktıvter ósimi boıynsha ázir­ge RBK Bank-ke teń keleri joq. Atalǵan banktiń ósimi 53,8 pa­ıyzǵa kóbeıip, 986,4 mlrd teńgeni quraǵan. Tek bir aıdyń ózindegi ósim kór­setkishi – 5 mlrd teńge.

Úzdik úshtikke memlekettik baǵdarlama aıasynda ıpotekalyq nesıeleýdi kózir qylǵan «Otba­sy bank» (+51,8 paıyz) pen reseılik enshiles «Sberbank» (+41,3 paıyz) kiredi. Aılyq dınamıkada 6 bank, jyldyq dınamıkada 9 banktiń ósimi oń nátıjege ıe.

«Qazaqstandyq bankterdiń aktıv ósimi boıynsha bıylǵy kórsetkishi koronadaǵdarysqa deıingi kezeńniń ózin basyp ozady. Salystyrar bolsaq, 2020 jyldyń aqpan aıynyń qorytyndysy boıynsha ekinshi deńgeıli bankterdiń aktıvi 26,7 trln teńgeni qurap, bir jyl burynǵymen salystyrǵanda 8,8 paıyzǵa ǵana joǵary boldy. 2019 jyldyń aqpanynda sektordyń jyldyq ósimi 4,1 paıyzdy quraǵan edi. Al bıyl naýryz aıynda ekinshi deńgeıli bankterdiń qaryz portfeli 15,4 trln teńgege jetti. Bul 2020 jylmen salystyrǵanda 5,7 paıyzǵa kóp. Nesıe port­feliniń bank aktıvterine qa­ty­nasy 48 paıyzdy qurady. Nesıe portfeliniń jyldyq dınamıkasynyń ósýi boıyn­sha kóshbasshylardyń ondyǵy­na sol úsh qarjy ınstıtýty (RBK Bank, «Otbasy bank» jáne «Sberbank») kiredi, bul olardyń nesıe naryǵyndaǵy jetekshi pozısııalarynyń turaqtylyǵyn kórsetedi. RBK Bank zaım portfelin 32 pa­ıyzǵa, «Otbasy bank» 31,8 pa­ıyz­ǵa, al «Sberbank» 23,5 pa­ıyz­ǵa arttyrǵan» delingen mo­nı­torıng jasaıtyn joba zertteýinde.

Bank sektoryn bankterdiń ózderi qalaı baǵalaıdy? Bul týraly olardyń sońǵy jyl­dar­daǵy esepterinen de anyq baı­qaýǵa bolady. Qarjy ınstı­týttary sektordyń ekono­mı­kaǵa áseri tómendep kele jat­qa­nyn jasyrmaıdy. «Bank sek­torynyń 2019 jyly ál­de­qaıda qarqyndy ósim kórset­kenine qaramastan onyń ekono­mıkaǵa áseri tómendep jatyr» delinedi «Halyq bank» habarlamasynda.

«Sberbank» sarapshylary­nyń aıtýynsha, 2008 jylǵy daǵ­darystan elimizdiń bank júıesi áli ońalyp kete alǵan joq. Buǵan 2014-2016 jyldardan bastalǵan daǵdarystan týyndaǵan kor­poratıvti nesıeleýdiń toqy­raýyn da qosyp qoıyńyz deı­di sarapshylar. ForteBank piki­rin­she, bólshek zaımdar nesıe naryǵynyń basty draıveri bolyp otyr. Olardyń jıyntyq qarjy portfelindegi úlesi 2018 jyldyń aıaǵynda 36,3 paıyzdan 2019 jyldyń aıaǵynda 42,9 paıyzǵa deıin ósken. Bul rette bólshek zaımnyń 70 paıyzy tutynýshylyq nesıelerge tıesili ekenin aıta ketý kerek. Ujymdyq nesıe kólemi 27,8 paıyzdy qurasa, nesıelerdegi shaǵyn jáne orta bıznes úlesi 26,9 paıyzǵa tómendegen.

Joǵarydaǵy oıdy «Bank SentrKredıt» te qýattaı túsedi. «Bólshek nesıe berý sońǵy úsh jylda turaqty ósý úrdisin kór­setti. Jeke tulǵalardyń ne­sıe qurylymynda negizgi ósim memleket yntalandyryp otyrǵan ıpotekalyq nesıe jáne tutynýshylyq nesıeleý ese­binen kóterilip otyr» deli­nedi bank esebinde.