Qazaqstan Respýblıkasynyń Ekologııa, geologııa jáne tabıǵı resýrstar mınıstri mundaı usynys Klımat boıynsha kóshbasshylar Sammıtinde talqylanǵanyn aıtty. Bul jóninde ol Twitter paraqshasynda jazdy, dep habarlaıdy Egemen.kz.
«AQSh Prezıdentiniń Klımat boıynsha kóshbasshylar Sammıti aıasyndaǵy dóńgelek ústelge qatystym. Elimizdegi beıtaraptyqqa jetýge baǵyttalǵan sharalar jóninde aıttym. Jańa Ekologııalyq kodekstiń normalary neǵurlym álsiz sektorlardyń klımattyń ózgerýine beıimdelý úrdisine júzege asyrýǵa qolaıly jaǵdaı týǵyzatynyn atap óttim. Sonymen birge elimiz AQSh-tyń jasyl qarjylandyrý granttyq baǵdarlamalaryna qatysýǵa daıyn ekenin jetkizdim. Bul eldiń 2050 jylǵa deıin tómen kómirtekti damý Tujyrymdamasyna sáıkes tereń dekorbanızasııa boıynsha neǵurlym joǵary nátıjege qol jetkizý úshin qajet. Atalǵan sharalar shyǵaryndylar kólemin 71%-ǵa tómendetedi», dep málimdedi vedomstvo basshysy.
Budan bólek mınıstr Qazaqstan klımattyń ózgerýi salasynda ǵalamdyq kún tártibin qoldaýǵa árqashan daıyn ekenin jetkizgen.
«Jalpy Qazaqstan TMD boıynsha Parıj kelisimin birinshi bolyp ratıfıkasııalady, sonymen qatar bizdiń elimiz Orta Azııada «jasyl ekonomıka» boıynsha kóshbasshy sanalady. Sondyqtan Qazaqstanda klımat máseleleri boıynsha Ortalyq Azııanyń Aımaqtyq habyn qurý týraly bastama kóterdim. Habtyń jumysy arqyly Ortalyq Azııada «jasyl» ekonomıkalyq ósimdi qamtamasyz etip, tehnologııalarmen, bilim jáne tájirıbemen almasýǵa bolady. Halyqaralyq qarjy ınstıtýttarynan qoldaý tabýǵa múmkindik bar. Qazaqstan klımattyń ózgerýi salasynda ǵalamdyq kún tártibin qoldaýǵa árqashan daıyn», dep jazdy mınıstr.