Kıprde álemdik shahmat juldyzdarynyń jarysy bastaldy. 15 sáýirde máresine jetetin dúbirli alamanǵa alǵash ret elimizdiń shahmatshysy qatysýǵa múmkindik aldy. Blısten álemniń úsh dúrkin chempıony Bıbisara Asaýbaeva tórtkúl dúnıege tanymal sańlaqtarmen birge dodaǵa túsedi.
Halyqaralyq shahmat federasııasy (FIDE) erler men áıelder arasyndaǵy úmitkerler týrnırin jyl saıyn uıymdastyrady. Názik jandylar dodasynda 35 jastaǵy qytaılyq Szıýı Venszıýn bastaǵan sańlaqtar bar. Qytaı qyzy 2018 jyldan beri osy týrnırdiń chempıondyq tájin eshkimge ustatpaı keledi. Onyń jerlesteri 2024–2025 jyldardaǵy gran-prı serııasynda jeńimpaz atanǵan Chjý Szıner, álem kýboginiń qola júldegeri Tan Chjýnı de tartysqa túsedi. Reseılik Aleksandra Gorıachkına (gran-prı serııasynyń kúmis júldegeri), 2024–2025 jyldardaǵy FIDE Women’s Events serııasynyń jalpy esebinde 2-oryn ıelengen ýkraınalyq Anna Mýzychýk, blısten úsh dúrkin álem chempıony reseılik Katerına Lagno, álem kýboginiń ıegeri úndistandyq Dıvıa Deshmýh pen onyń otandasy Vaıshalı Rameshbabý da baǵyn synaıdy.
Bıbisara birinshi aınalymda osy Vaıshalı Rameshbabýmen teń tústi. Úndistandyq shahmatshy byltyr Grýzııanyń Batýmı qalasynda ótken álem kýboginiń shırek fınalynda Merýert Qamalıdenovany utqan edi.
Áıelder arasyndaǵy álemdik táj úshin ótip jatqan úmitkerler týrnıri 1952 jyldan beri uıymdastyrylady. Qatysýshylar 14 týrdy aınalmaly júıemen ótkizedi. Ýaqyt baqylaýy klassıkalyq: alǵashqy 40 júriske 90 mınýt, sodan keıin partııa aıaqtalǵansha 30 mınýt, sonymen qatar ár júristen bastap 30 sekýnd qosylady.Týrnırdiń júlde qory – 300 myń eýro. Chempıon atanǵan sańlaq 28 myń eýro alsa, 2-oryn alǵan shahmatshyǵa 17 myń eýro, 3-oryndy enshilegenge 8 600 eýro syıaqy buıyrady. Eger upaı sany teń bolsa, aqshalaı júlde qory teńdeı bólinedi.
Shahmatpen 18 jyldan beri turaqty aınalysyp kele jatqan 22 jastaǵy jerlesimiz B.Asaýbaeva byltyr grossmeıster atandy, 2020 jyly halyqaralyq sheber ataǵy berilse, 2019 jyly áıelder arasyndaǵy grossmeıster ataǵyna qol jetkizdi. Jeti jasynda-aq qatarlastarynan qara úzip, álem chempıony atanǵan talantty qyz eresekter qataryna ótip, blısten 2021, 2022, 2025 jyldary úsh dúrkin álem chempıony ataǵyn qanjyǵasyna bókterdi. 2023 jyly ótken álem chempıonatynda, sondaı-aq 2024 jyly ulttyq qurama sapynda shahmat olımpıadasynda kúmis medal enshiledi. Byltyr FIDE-niń «Women’s Grand Swiss» týrnırinde qola medalǵa ıe boldy.