Avtokólik alǵysy kelgen qazaqstandyqtar kóńili qalaǵan bank nemese kólik salonyna baryp, kezekke tura alady. Alaıda qyzmetterdiń barlyǵy jappaı onlaınǵa kóship jatqan ýaqytta bank bólimshesine baryp júrýdiń ózi ýaqyt alady. Ári COVID-19 pandemııasynyń qaıta asqyna bastaýy da adamdar kóp shoǵyrlanǵan jerlerden aýlaq júrýdi talap etedi. Osyǵan oraı elimizde «avto kezek» onlaın qyzmeti iske qosyldy.
Qazaqstan damý bankiniń habarlaýynsha, otandyq avtoóndiristi qoldaý baǵdarlamasy aıasynda azamattar jeńildetilgen avtonesıege bergen ótinimin onlaın túrde baqylap otyra alady. Ázirge «avto kezek» onlaın qyzmetin úsh bank – ForteBank, Halyk Bank jáne «VTB Bank (Qazaqstan)» usynyp otyr.
2019 jyly naýryz aıynda 13 myńnan astam qazaqstandyq 57,4 mlrd teńgege avtonesıe rásimdese, 2020 jyly sáýir aıynda olardyń sany 20 myńnan asyp, zaım kólemi 98,05 mlrd teńgege jetken. 2021 jyl bastalǵaly alty bank 140 mlrd teńgege jýyq qarajatty avtonesıe aıasynda berip úlgerdi.
«Baǵdarlamany qarjylandyrý úshin jyl saıyn óte kóp kólemde qarjy bólinip jatyr. El turǵyndary asa belsendi túrde ótinim qaldyrýda. Sonyń saldarynan azamattar óz kezegin aılap kútýge májbúr. О́tinim mártebesin tekserip otyrý onlaın qyzmeti iske qosylǵannan keıin avtonesıeni alý prosesi áldeqaıda jeńildeı jáne ashyq bola tústi. О́tinim qaldyrý esh qıyn emes. Ol úshin ózińiz ótinim qaldyrǵan ekinshi deńgeıli banktiń resmı saıtyna kirip, «avto kezek» nemese «avtonesıeleý» bóliminde jeke derekterińizdi (JSN nemese telefon nómirin) engizý jetkilikti.
Qazaqstan damý banki 2015 jyldan beri jeńildetilgen avtonesıe baǵdarlamasynyń operatory bolyp jumys istep kele jatyr. Baǵdarlama bastalǵaly beri bank 82 mlrd teńge jibergen.