Nur-Sultan qalasynyń ákimi Altaı Kólginov Instagram paraqshasynda jeńildikpen salynatyn páterler sany kóbeıetinin málim etti, dep habarlaıdy Egemen.kz.
«Elordanyń ár aýdanyn «Nur-Sultan – jaıly qala» master-jospary aıasynda ortalyqtandyryp damytýdamyz. Sonymen qatar qala turǵyndaryna qolaıly jaǵdaı jasaý úshin abattandyrýǵa, qoǵamdyq keńistikter (saıabaqtar, skverler, býlvarlar, aýlalar) ashýǵa jáne kógaldandyrýǵa erekshe kóńil bólemiz.
Búgin qoljetimdi jeńildikpen beriletin turǵyn úı qurylysynyń barysymen tanystym. Turǵyn úı keshenderi Almaty aýdanynda («Metro» jaǵynda) ornalasqan. Aýmaqty abattandyrýǵa, kógaldandyrýǵa, turǵyn úı keshenine kirý toptaryn qurýǵa erekshe nazar aýdara otyryp, qurylys sapasyn birinshi orynǵa qoıýdy tapsyrdym», dedi Altaı Kólginov.
Sondaı-aq Memleket basshysynyń tapsyrmasy boıynsha jeńildikpen beriletin turǵyn úı sanyn arttyrý boıynsha júıeli jumys júrgizip jatqanyn aıtty.
«Eger 2018 jyly 1800, 2019 jyly 2900 páter salynyp, paıdalanýǵa berilse, 2020 jyly bul kórsetkish 7 myń áleýmettik páterge ulǵaıtyldy. Osy jyly kórsetkishti 10 myń qoljetimdi jeńildikpen beriletin turǵyn úıge deıin jetkizýdi josparlap otyrmyz.
Budan ári jańa úıler men áleýmettik nysandardy sýmen, kárizben jáne jylýmen qamtamasyz etý úshin 3-JEO (1-kezek, jylýmen jabdyqtaý), KTQ-2 (kárizdik tazartý qurylystary) jáne SJ-3 (sýmen jabdyqtaý) jobalaýyn, qurylysyn júrgizemiz», dep jazdy qala ákimi.