Kóne Taraz shaharyn qaq jaryp, Talas ózeni aǵyp jatyr. Ejelden Taraz ben Talas birge atalady. El arasynda «Qarataýdyń qushaǵynda qyryq bulaq bar bolsa, Talas ózeniniń qyryq saǵasy bar», degen sóz bar. Ataqty Maıkót aqyn Qulmambet aqynmen aıtysynda da Talas ózenin jyrǵa qosady. Jalpy, atalǵan ózenniń tarıhy tym áriden bastaý alady desek te bolady.
Máselen, ertede Taraz sulýlaryn jyrǵa qosqan uly shyǵys shaıyrlary da osy Talas týraly tebirenbeı jaza almaǵan. Ǵashyqtyq ǵazaldaryna qosyp órgen Talastyń tumsa tabıǵaty, tunyq jaratylysy sózben salynǵan sýret bolyp tunyp tur.
Kezinde tabıǵattyń osy bir baılyǵyn tıimdi paıdalaný kerektigi jıi aıtylatyn. Shyndyǵyna kelgende, Talas ózeni aǵyp jatqan aýmaqtyń ózi de tamyljyp, barlyq sulýlyqqa suranyp tur. Aldynda Taraz aýmaǵyndaǵy «Tekturmas» tarıhı-mádenı keshenin jańǵyrtý jumystary júrgizilgen bolatyn. Bul da osy Talas ózeniniń aýmaǵynda ornalasqan. Endi atalǵan keshendi jańǵyrtýdyń úshinshi kezeńi de júzege asa bastady. Talas ózeniniń boıynda qala turǵyndarynyń tynyǵýyna arnalǵan jaǵalaý jumystary da bul kúnde aıaqtalǵan. Atalǵan jaǵalaýdyń uzyndyǵy 423 metrdi quraıdy. Sonymen qatar, munda jaıly oryndyqtar ornatylǵan. Jumys barysynda tabıǵı landshaft barynsha saqtalǵan. Al qoldan jasalǵan quzdardan sarqyrap aqqan sarqyrama kórer kózge ádemi áser syılaıdy. Oǵan sý arnaıy qazylǵan qudyqtardan quıylyp jatyr. Endi Talas ózeniniń qarama-qarsy jaǵalaýyn abattandyrý jobasy da daıyn tur eken. Kóp uzamaı ol da iske asatyn bolady.
Jambyl oblysy