Qasıetti Ramazan aıynda kúlli musylman balasyna paryz bolǵan Oraza qulshylyǵynyń ishinde myń aıdan da qadirli «Qadir túni» bar. Bul kún bıyl mamyrdyń 8-inen 9-yna qaraǵan túnge sáıkes kelýde.
Alla taǵala Qadir túniniń dárejesin kótergen. О́ıtkeni bul túnde tilegen duǵa-tilekter qabyl bolady. Rabbymyz pendesine basqa túnderde bermegen rızyq-nesibesin osy túnde úlestiredi. Sol sebepti, musylman qaýymy bul qulshylyqty qur jiberip almaýǵa tyrysady.
Jalpy, Qadir túniniń qasıeti qandaı, degenge toqtalsaq: birinshiden bul túnde paıǵambarymyzǵa (s.ǵ.s) alǵashqy Quran aıaty túsken. Qasıetti kitaptyń «Qadir» súresiniń 1-aıatynda: «Rasynda, Biz ony (Quran Kárimdi) Qadir túni túsirdik» deıdi.
Ekinshi qasıeti – bul túndi qulshylyqpen ótkizgen pendeniń Jaratýshysy aldynda dárejesi artady, tilegen duǵasy qabyl bolady. Bul týraly úlken ǵulama Jazaıırı: «Qadir túni – sózsiz eń jaqsy tún! Alla taǵala ony berekeli etti. Ol túni Qurandy túsirip, basqa túnderden ereksheledi. Sondaı-aq osy túndi qulshylyqpen ótkizgen adamǵa seksen úsh jyl ǵıbadat etkenniń saýaby jazylady», degen eken.
Úshinshi qasıeti – bul túni adamnyń taǵdyry bekitiledi. Bul týraly ǵulama ǵalym Mýjahıt: «Qadir túni – taǵdyr túni. Alla taǵala bul túni kelesi jylǵy osy túnge deıin kimniń ajaly jetetinin, kimge qansha rızyq-nesibe bólinetinin, t.b. úkimderdi belgileıdi», degen eken.
Tórtinshi qasıeti – bul túnde azǵyrýshy ázázil tusaýlanady. Bul úkim jaıly úlken sahaba ıbn Abbastyń: «Bul – amandyq, esendik, tynyshtyq túni. Bul túni shaıtandar adamdarǵa tynyshtyq beredi. Olar adamdarǵa jaqyndamaıdy, azǵyryp, týra joldan taıdyra almaıdy», degen úkimi bar.
Besinshi qasıeti – kúnálar keshiriledi. Paıǵambarymyz (s.ǵ.s): «Kimde-kim osy túnde Allaǵa ıman keltirip, saýabynan úmittenip, qulshylyq etetin bolsa, Alla taǵala onyń burynǵy istegen barlyq kúnásyn, kemshilikterin, qatelikterin keshiredi», degen.
Kelesi suraq: «Qadir túnin qalaı ótkizgen durys?» degenge toqtalsaq, ıslam ǵulamalary biraýyzdan tómendegi úkimderdi durys dep tapqan. Eń áýeli, bul túnde Alla rızashylyǵy úshin ǵıbadat jasap, Quran nemese namaz oqyp, qulshylyq sezimderimizdi arttyrýymyz kerek eken. Odan keıin qadirli paıǵambarymyzǵa (s.ǵ.s) salaýat aıtyp, onyń shapaǵatyna úmit etýmen qatar, úmbeti ekenimizdi sezinip, Alla elshisiniń hadısterine amal etken durys degen paıym bar. Sonymen qatar adamdy izgilikke bastaıtyn ýaǵyz-nasıhat tyńdap, suhbattar quryp, kúndelikti kúıbeń tirshilik barysynda júrekke túsken kirbińdi jýyp-shaıyp, kóńilge uıalaǵan kómeskilikten arylýǵa tıistimiz.
Sóz sońynda aıtarymyz, Qadir túniniń qurmetine Rabbymyzdan elimiz aman, jurtymyz tynysh bolsyn dep tileýimiz kerek. Sondaı-aq Qadir túni jasaǵan duǵalar jaqsylyqqa muryndyq bolýyn, dostyq pen baýyrmashyldyqty arttyryp, Islam áleminiń birtutastyǵyn jáne kúlli adamzatty apattardan saqta dep tileýimiz shart eken. Myń aıdan da qaıyrly Qadir túninde tilegen tilekterimiz ben qulshylyqtarymyzdy Alla taǵala qabyl etkeı!