Halyqtyń densaýlyǵyna den qoıý odan saıyn mańyzdana túsken qazirgi syn saǵatta Áleýmettik medısınalyq saqtandyrý qorynyń jumysy erekshe nazarda. Atalǵan qordyń basqarma tóraǵasy Bolat Tókejanov Ortalyq kommýnıkasııalar qyzmeti alańynda atqarylǵan jumystar jóninde jan-jaqty maǵlumat berip, jýrnalısterdiń suraqtaryna jaýap berdi.
Azamattar koronavırýs ınfeksııasyn juqtyrǵan jáne pnevmonııaǵa shaldyqqan jaǵdaıda Áleýmettik medısınalyq saqtandyrý qoryndaǵy mártebesine qaramastan medısınalyq kómekti tegin alady. Qor indetpen kúres boıynsha is-sharalardy qarjylandyrýǵa 71,6 mlrd teńge baǵyttady.
– Indetpen kúres kezinde medısınalyq saqtandyrý qorynyń qarajaty esebinen PTR-zertteýlerge qoljetimdilik qanshalyqty artqanyn atap ótkim keledi. О́tken jyly shamamen 1,9 mln PTR-test júrgizilse, osy jyldyń alǵashqy úsh aıynda KVI vırýsyn anyqtaýǵa 1,3 mln zertteý qarjylandyryldy. Sondaı-aq qor byltyr mobıldi brıgadanyń 550 myń kómegin qarjylandyrdy, al bıyl tek birinshi toqsanda koronavırýs belgileri bar pasıentterge jarty mln-nan asa kómek kórsetildi, – dedi B.Tókejanov.
1 toqsannyń qorytyndysyna toqtalǵan qor basshysy koronavırýspen kúreske bólingen bıýdjettiń negizgi somasy aldyńǵy shepte jumys istep júrgen medısına qyzmetkerleriniń jalaqysyna ústemeaqy tóleýge qarastyrylǵanyn atap ótti. Naqtyraq aıtqanda, qańtarda 50,5 myń medısına qyzmetkeri 13,9 mlrd teńge somasynda ústemeaqy, aqpanda 51,7 myń medısına qyzmetkeri 13,8 mlrd teńge somasynda ústemeaqy aldy. Al naýryz aıynda 53,2 myń qyzmetkerge berilgen tólemder somasy 14,7 mlrd teńgeni qurady. Osy ústemeaqylar arqyly ınfeksııalyq stasıonarlardaǵy keıbir dárigerlerdiń jalaqysy 1 mln teńgege jetti.
Qor jumysynyń bir baǵyty – halyqpen keri baılanys ornatý jáne pasıentterdiń quqyqtaryn qorǵaý. Bul rette shaǵymdar men usynys-tilekterge basa kóńil bólinedi. Shaǵymdardyń 35,7%-y medısınalyq kómek kórsetýden bas tartý, 20,3%-y kórsetilgen medısınalyq qyzmetterdiń sapasy, 10,7%-y aqyly negizde TMKKK jáne MÁMS kiretin qyzmetterdi alýǵa joldaý, 10,6%-y aqparattyq júıelerde naqty kórsetilmegen qyzmetterdi anyqtaý, 8,5%-y dárilik preparattarmen qamtamasyz etýden bas tartý týrasynda bolǵan.
– 1 toqsannyń qorytyndysy boıynsha qor sarapshylary 203,6 myń aqaýdy anyqtady, aıyppuldardy esepke alǵanda 3,5 mlrd teńge somasyn qurady. Anyqtalǵan aqaýlardyń ishinde 29,3 mln teńge somasyna 3 823 jaǵdaı jalǵan esep dep atalatyn kórsetilmegen qyzmetterdi quraıdy. Bıyldan bastap mundaı keleńsiz jaǵdaılardyń aldyn alý úshin qor monıtorıngtiń jańa túri proaktıvti monıtorıngti engizdi. Endi aqaý anyqtalǵan jaǵdaıda qorytyndyǵa qol qoıylǵan kúnnen bastap 45 kúntizbelik kún ishinde másele sheshilýi kerek. Kórsetilgen merzimde aqaýlar joıylmaǵan jaǵdaıda aıyppuldar qarastyrylǵan, – dedi ÁMSQ basshysy.
B.Tókejanovtyń aıtýynsha, 2021 jylǵa arnalǵan satyp alý jospary boıynsha halyqqa medısınalyq kómek kórsetýge 1,8 trln teńge, onyń ishinde TMKKK-ke 1,1 trln teńge, MÁMS-ke 700 mlrd teńge qarastyrylǵan.
Qor 2021 jyly ambýlatorııalyq-emhanalyq jáne stasıonardy almastyratyn kómekti, aýyldyq densaýlyq saqtaýdy, qashyqtan kórsetiletin medısınalyq kómekti, profılaktıkalyq tekserýlerdi, meıirbıkelik kómekti jáne patronajdyq qyzmetti qarjylandyrýdy ulǵaıtady. Erekshe qajettilikteri bar balalardy medısınalyq ońaltý, EKO jáne «Qamqorlyq» kvotalaryn ulǵaıtý boıynsha «Ańsaǵan sábı» baǵdarlamalaryn iske asyrý qor tarapynan tolyq qarjylandyrylady. Sonymen qatar antenataldy baqylaýdy júrgizýge qosymsha 29,7 mlrd teńge bólingen, 5 jasqa deıingi balalardy profılaktıkalyq tekserýge – 12 mlrd teńge, sondaı-aq mektep medısınasyn damytýǵa 22,5 mlrd teńge bólindi.
Aýyldyq jerlerde medısınalyq qyzmetterdiń qoljetimdiligin arttyrý úshin ótken jyly 100 jyljymaly medısınalyq keshen satyp alyndy. Bıyl barlyq aýyl turǵynyna 149 jyljymaly medısınalyq keshen qyzmet kórsetedi. Onyń ishinde beıindi mamandardyń konsýltasııalaryn alý, skrınıngten, dıagnostıkadan ótý, zerthanalyq taldaýlar jasatý, vaksına saldyrý, aýrýhanaǵa jatqyzýǵa joldama alý jáne medısınalyq kómektiń basqa da túrlerin alýǵa bolady. Birinshi toqsanda «jyljymaly emhanalar» dep atalatyn mobıldi medısınalyq keshender arqyly aýyl turǵyndaryna 231,9 mln teńgege 120 myń medısınalyq qyzmet kórsetildi.
Sonymen qatar Bolat Tókejanov maqsatty toptaǵy pasıentterdi dári-dármekpen qamtamasyz etýge erekshe kóńil bólinetinin aıtty. 2021 jyly ambýlatorııalyq dári-dármekpen qamtamasyz etýge 152,4 mlrd teńge bólinipti.