2020-2025 jyldarǵa arnalǵan «Nurly jol» memlekettik baǵdarlamasy aıasynda elimizde 11 myń shaqyrym avtojol aqyly bolady. Onyń ishinde jalpy uzyndyǵy 5,8 myń shaqyrymdy quraıtyn 18 ýchaske aǵymdaǵy jyldyń maýsym aıynan bastap paıdalanýǵa beriledi.
Jańadan paıdalanýǵa beriletin avtomagıstraldardyń qatarynda: Shymkent – О́zbekstan shekarasy, Oral – Reseı Federasııasynyń shekarasy (Saratov), Oral – Reseı shekarasy (Samara), Orynbor – Aqtóbe, Shýchınsk-Petropavl, Shymkent – Qyzylorda, Shymkent – Taraz, Taraz – Qaınar, Qapshaǵaı – Taldyqorǵan, Qarabutaq – Qyzylorda, Aqtóbe – Oral, Atyraý – Beıneý – О́zbekstan shekarasy, Aqtaý – Beıneý, Qostanaı – Reseı shekarasy (Troısk), Nur-Sultan – Qostanaı, Pavlodar – Reseı shekarasy (Omby), Nur-Sultan – Pavlodar, Pavlodar – Semeı – Qalbataý ýchaskeleri bar.
Bul ýchaskelermen júretin avtokólikterden qansha tólemaqy alynatyny tas joldyń tehnıkalyq sanatyna tikeleı baılanysty. Máselen, I tehnıkalyq sanattaǵy tas joldarda barlyq avtokólikten, al II jáne III tehnıkalyq sanattaǵy tas joldarda tek júk kólikterinen tólem alynady.
«QazAvtoJol» UK» AQ habarlamasyna súıensek, alǵashqy aqyly ýchaske engizilgen kezden bastap, búginge deıin jol tarıfterine ózgeris engizilmegen. Al jańa aqyly ýchaskelerde tólem mólsherlemesi qandaı bolatynyn Indýstrııa jáne ınfraqurylymdyq damý mınıstrligi qarastyryp jatyr. Biraq joldarǵa synaq merzimi júrgizilgen kezde avtokólikterden ázirshe tólem alynbaıdy, deıdi mamandar.
Memlekettik baǵdarlamany júzege asyrý barysynda Indýstrııa jáne ınfraqurylymdyq damý mınıstrligi men «QazAvtoJol» UK» AQ birlesip, tólem alýdyń «ashyq júıesin» engizbekshi. Onyń ereksheligi, ýchaskelerde shlagbaýmdar bolmaıdy. Avtokólikterdiń júrip ótken joly týraly aqparattar arkalarda ornalasqan arnaıy kameralarda tirkeledi.
Tólem avtokóliktiń memlekettik tirkeý nómiri boıynsha júrgiziledi. Sondaı-aq tólemaqy men avtokólik týraly tolyq aqparat alýǵa múmkindik beretin arnaıy belgilerdi (RFID-belgi) ornatý da josparda bar.
Aqyly ýchaskelerdiń kóbeıýi júrgizýshiler men jolaýshylardyń qaýipsizdigin qamtamasyz etedi, jol-kólik apaty azaıady, jol ınfraqurylymy damıdy, deıdi mamandar.
«QazAvtoJol» UK» AQ baspasóz qyzmetiniń málimeti boıynsha, joldar qaıta jańǵyrtylyp, jóndelgennen keıin kólik apaty azaıǵany baıqalǵan. Mysaly, qaıta jańartý jumystarynan keıin «Aqtóbe – Oral – Reseı shekarasy» avtojolyndaǵy kólik apaty 25%-ǵa, «Nur-Sultan – Pavlodar» avtojolynda 46%-ǵa, «Qyzylorda – Shymkent – Taraz» avtojolynda 43%-ǵa, al «Pavlodar – Semeı – Qalbataý» ýchaskesinde 62%-ǵa tómendepti.