Qazaqstan Prezıdenti Qasym-Jomart Toqaevtyń tóraǵalyǵymen Joǵary eýrazııalyq ekonomıkalyq keńestiń kezekti otyrysy jumysyn bastady, dep habarlaıdy Egemen.kz.
Eýrazııalyq ekonomıkalyq odaqqa múshe elderdiń barlyǵynyń Prezıdentteri onlaın rejımde qatysyp otyrǵan is-shara barysynda odaqtyń ishki naryǵyndaǵy kedergilerdi joıý, osy ýaqytqa deıin atqarylǵan jumystardyń qorytyndysy, 2020 jylǵy halyqaralyq qyzmettiń negizgi baǵyttarynyń iske asyrylýy syndy máseleler qarastyrylmaq. Munan bólek, JEEK-ke qatysýshy elderdiń basshylary múshe memleketterdiń 2021-2022 jyldarǵa arnalǵan makroekonomıkalyq saıasatynyń negizgi baǵdary, medısınalyq maqsatta paıdalanýǵa arnalǵan farmasevtıkalyq sýbstansııalar men dári-dármek óndirisi salasyndaǵy yntymaqtastyq týraly máselelerdi qozǵaıdy.
Otyrysta Joǵary eýrazııalyq ekonomıkalyq keńestiń Qurmetti tóraǵasy, Qazaqstannyń Tuńǵysh Prezıdenti – Elbasy Nursultan Nazarbaev, Reseı Federasııasynyń Prezıdenti Vladımır Pýtın, Belarýs Respýblıkasynyń Prezıdenti Aleksandr Lýkashenko, Qyrǵyz Respýblıkasynyń Prezıdenti Sadyr Japarov, Armenııa Respýblıkasy Premer-Mınıstriniń mindetin atqarýshy Nıkol Pashınıan, Eýrazııalyq ekonomıkalyq komıssııa alqasynyń tóraǵasy Mıhaıl Mıasnıkovıch sóz sóıleıdi dep kútiledi. Sondaı-aq Kýba Respýblıkasynyń Prezıdenti Mıgel Dıas-Kanel jáne О́zbekstan Respýblıkasynyń Prezıdenti Shavkat Mırzııoev Joǵary eýrazııalyq ekonomıkalyq keńes janyndaǵy baqylaýshy-memleket basshylary retinde qatysýda. Osyǵan deıin, Prezıdent Qasym-Jomart Toqaevtyń tóraǵalyǵymen Joǵary eýrazııalyq ekonomıkalyq keńestiń kezekti otyrysy ótetini habarlanǵan bolatynbyz.
Jıyn «Habar24» telearnasy men QR Prezıdenti Baspasóz qyzmetiniń Facebook áleýmettik jelisindegi paraqshasynan tikeleı efırde kórsetilip jatyr.