Búginde Jambyl oblysynda «Jomart túlek» jobasy bastaý alyp, jemisti jalǵasýda. Atalǵan joba aıasynda Shý aýdanynyń mektepterinde tuńǵysh ret «Belsendi túlekter jáne túlek joly» kishi jobalary júzege asyrylyp otyr, dep habarlaıdy Egemen.kz.
Jobanyń negizgi maqsaty – mektep bitirgen túlektermen mektep arasyndaǵy baılanysty nyǵaıtý jáne jetistikke jetken mektep túlekterin nasıhattaý bolyp tabylady.
Qazaq handyǵynyń týy tigilgen Shý óńirinen kóptegen memleket jáne qoǵam qaıratkerleri, sonymen qatar saıasattanýshylar men professorlar syndy talaı tulǵalar shyqqan. Shý qalasy, S.Seıfýllın atyndaǵy orta mekteptiń túlegi, birqatar memlekettik deńgeıdegi qyzmetterde bolǵan Mahmut Qasymbekov, belgili memleket jáne qoǵam qaıratkeri, birqatar laýazymdy qyzmetter atqarǵan saıasattanýshy, Jańajol aýyly, B.Momyshuly atyndaǵy orta mekteptiń túlegi Sarybaı Qalmyrzaev, kezinde QR Prezıdenti Ákimshiliginiń basshysy, Prezıdenttiń is basqarýshysy, elimizdiń ekonomıkalyq sybaılas jemqorlyqqa qarsy kúres agenttiginiń tóraǵasy qyzmetterin atqarǵan, Tóle bı aýyly, M.Áýezov atyndaǵy orta mektebiniń túlegi Qozy-Kórpesh Qarbozov, Birlikústem aýyly, Domalaq ene orta mektebiniń jáne Shý qalasyndaǵy S.Seıfýllın atyndaǵy orta mekteptiń túlegi, Parlament májilisiniń V-VI shaqyrylym depýtaty Qojahan Jabaǵıev, Tóle bı aýyly, M.Áýezov atyndaǵy orta mekteptiń túlegi, sol kezdegi Ońtústik Qazaqstan oblysynda ál-Farabı aýdanynyń ákimi jáne Astana qalalyq til basqarmasynyń basshysy qyzmetterin atqarǵan, Parlament májilisiniń V-shaqyrylym depýtaty bolǵan Orazkúl Asanǵazy, Domalaq ene orta mektebiniń túlegi, kezinde Jambyl oblysynyń ákimi jáne ózge de laýazymdy qyzmetter atqarǵan Bóribaı Jeksembın, Shý qalasy, Abaı atyndaǵy orta mekteptiń túlegi, elimizdiń temirjol salasynda laýazymdy qyzmet atqarǵan jáne Jambyl oblysynyń ákimi qyzmetinde bolǵan Kárim Kókirekbaev, M.Áýezov orta mektebiniń túlegi, «Shý aýdanynyń Qurmetti azamaty», akademık Mámbet Qoıgeldıev, Tóle bı aýyly, M.Áýezov orta mektebiniń túlegi, QR joǵarǵy oqý oryndarynyń úzdik oqytýshysy, QR prezıdentiniń «Bolashaq» halyqaralyq stıpendııasynyń ıegeri Ońǵarbek Álipbekuly sııaqty azamattar búginde aýdannyń maqtanyshy.
El Táýelsizdiginiń 30 jyldyǵyna oraı óńirde tuńǵysh ret qolǵa alynǵan «Jomart túlek» jobasy aıasynda uıymdastyrylyp otyrǵan «Jomart túlek – Shý» túlekter kezdesýin aýdan ákimi Nurjan Kalenderov júrgizip otyrdy. Ákim óz sózinde túlekterdiń aýylǵa jıi qoldaý kórsetip kele jatqanyn atap ótti. Táýelsizdik alǵan jyldardan beri Shý aýdanynyń mektepterinen 30 myńnan astam túlek túlep ushqan. Bul kezdesýge oflaın jáne onlaın formatta 500-ge jýyq túlekter qatysty. Elimizde ár salada jetistikke jetken azamattarmen qatar, Shý aýdanynda dúnıege kelip, búginde Túrkııa, Izraıl, Reseı, Amerıka jáne taǵy basqa da memleketterde turyp jatqan jerlester de qatysty.
Sonymen qatar D.Qonaev aýylyndaǵy Tóle bı atyndaǵy orta mektep bazasynan «Túlekter ortalyǵy» ashyldy. Ol jerde aýdannan shyqqan kóptegen belsendi «Jomart júrek» túlekterdiń fotoshejirelerinen quralǵan albomdar qoıylǵan. Shý aýdanynan shyqqan Mahmut Qasymbekov, Bolat Saýranbaev, Ilııas Tortaev basqa da mesenattar aýdanǵa demeýshilik jasap turady. Sondaı-aq sońǵy úsh jylda birqatar mesenat túlekterdiń bastamasymen 700,0 mıllıon teńgeden astam kólemde kómekter kórsetilip kelgen.
Belbasar aýylyna Bolat Saýranbaev sport keshenin, Shý qalasyna Iýrıı Shaı «Tarlan» sport keshenin salyp berse, Ǵalııa Ábitaevanyń bastamasymen aýdannyń kásipkerleri medısına mekemelerine koronavırýs indetimen kúres kezinde 60,0 mıllıon teńgege ókpeni jasandy jeldetý apparattaryn alyp bergen. Al, D.Qonaev aýyly, Tóle bı atyndaǵy mekteptiń túlekteri zamanaýı úlgidegi kishi fýtbol alańyn salyp berse, Kókqaınar aýyly, Sattar Estemesov atyndaǵy orta mektebiniń túlegi Marat Syrlybaev matematıka kabınetin jabdyqtap, kúrdeli jóndeýden ótkizgen. Sonymen qatar basqa da kóptegen túlekter óz mektebine, aýylyna, ustazdaryna demeýshilik kórsetip, oqýshylarmen 34 motıvasııalyq kezdesý uıymdastyrǵan.
Jambyl oblysy