Mınskide bolǵan oqıǵaǵa baılanysty Belarýstyń «Belavıa» áýe tasymaldaýshysy búginnen bastap 8 elge saparlaryn toqtatady, dep habarlaıdy Egemen.kz «Habar 24» arnasyna silteme jasap.
Tıisti aqparat avıakompanııanyń saıtynda jazylǵan. Sóıtip 27 mamyr men 30 qazan aralyǵynda myna 12 baǵyt boıynsha reıster oryndalmaıdy. Bul – Varshava, Mılan, Amstredam, Rım, Maındaǵy Frankfýrt, Berlın, Mıýnhen, Gannover, Vena, Brıýssel, Barselona men Kalınıngrad.
Atalǵan baǵyttar boıynsha bılet satyp alyp qoıǵan jolaýshylarǵa bir jyl ishinde onyń tolyq quny qaıtarylady.
Buǵan deıin kompanııa Shvesııa, Ulybrıtanııa, Fransııa, Lıtva men Ýkraınaǵa da saparlaryn toqtatqan edi. Negizi Blýmberg agenttiginiń habaralýynsha, byltyr «Belavıa» 210 mıllıon dollar paıda tapqan eken. Alaıda sońǵy oqıǵalarǵa baılanysty sarapshylar «kompanııa bıyl sol tabysynyń jartysynan aıyrylýy múmkin» dep topshylap otyr.